वीरगञ्ज । मधेश प्रदेशका प्रहरी प्रमुख डिआइजी यज्ञविनोद पोखरेलसहित १० जना प्रहरी अधिकारीलाई विभागीय अनुसन्धानमा तानिएको छ। एक व्यक्तिको बैंक खाताबाट रकम ट्रान्सफर भएको खुलासा भएपछि उनीहरूलाई अनुसन्धानका लागि तानिएको हो।

प्रहरी महानिरीक्षक बसन्तबहादुर कुँवरले केही दिनअघि रुपन्देहीको भ्रमणका क्रममा सबै प्रहरी अधिकारीको बैंक खाता जाँच भइरहेको जानकारी दिएका थिए। सोही जाँचपछि डिआइजी पोखरेलको खातामा अस्वाभाविक रकम भेटिएको छ।

स्रोतका अनुसार, पूर्वगृहमन्त्री विमलेन्द्र निधिका निकटस्थ जितेन्द्र कर्णको बैंक खाताबाट डिआइजी पोखरेलको खातामा ठूलो रकम ट्रान्सफर भएको फेला परेको छ। यसै कारण, डिआइजी पोखरेललाई विभागीय अनुसन्धानमा राखिएको छ।

अनुसन्धानका क्रममा, कर्णको खाताबाट रकम पोखरेलको खातामा गएपछि कर्णलाई काठमाडौं तानेर विभागीय अनुसन्धान अगाडि बढाइएको छ। डिआइजी पोखरेलको भ्रष्टाचार र अनैतिक क्रियाकलापमा संलग्नता भएको आशंका गरिएको छ।

यस घटनामा मधेश र कोशी प्रदेशका १० जना प्रहरी अधिकारीलाई पनि बयानका लागि तानिएको छ। अनुसन्धानका लागि प्रधान कार्यालयले सीमा प्रहरी चौकी दुहबी धनुषाका सई चन्द्रप्रसाद यादव, प्रहरी चौकी महुवा सप्तरीका असई उपेन्द्र प्रसाद यादव, जिल्ला प्रहरी कार्यालय धनुषाका वरिष्ठ हवल्दार निरज कुमार साह लगायतलाई मुख्यालयमा तानेको छ।

प्रहरी प्रवक्ता दानबहादुर कार्कीले विभिन्न उजुरीको आधारमा अनुसन्धान भइरहेको पुष्टि गरेका छन्। डिआइजी पोखरेल केही महिनामै अनिवार्य अवकास पाउने क्रममा रहेका छन् भने उनी हाल जनकपुरधाममा रहेका छन्, मधेश प्रदेशका प्रहरी उपरीक्षक सुभाष बोहराले जानकारी दिएका छन्।