काठमाण्डौ । पाल्पाको रैनादेवी छहरा–२ सर्देवास्थित सीजी सिमेण्ट उद्योगमा एक कामदारको मृत्यु भएको छ । मंगलबार राती १० बजेतिर कोइला पेल्ने (धूलो पार्ने) मेसिनमा परेर ४८ वर्षीय दिनेश शर्माको मृत्यु भएको हो ।
सिजी सेमेण्ट इन्डस्ट्रिज पाल्पा प्रालिले सञ्चालन गरेको क्लिङ्कर उद्योगमा यस्तो घटना भएको हो । मेसिन सफा गर्न भनेर दुई जना कामदार मेसिन भित्र पसेका बेला ‘अकस्मात् मेसिन चलेको’ पाल्पा प्रहरीले जानकारी दिएको छ । त्यस क्रममा अर्का एक जना मेसिन भित्रबाट भाग्न सफल भएको र शर्माको भने मृत्यु भएको प्रहरीले जनाएको छ । यस घटनामा मेसिन कसरी चल्यो वा कसले, किन चलायो भन्ने बारेमा अनुसन्धान भइरहेको प्रहरी स्रोतले जानकारी दियो । ‘मृतकका आफन्त आउँदै गरेकाले अहिले घटनास्थल सिल गरेर राखिएको छ, भर्खरैमात्र मुद्दाको टोलीले अनुसन्धान सुरु गरेको छ’, अनुसन्धानमा संलग्न प्रहरी अधिकृतले भने ।
images
धादिङको त्रिपुरासुन्दरी गाउँपालिका वडा नम्बर ६ घर भएका शर्मा गत साउनमा मात्रै ‘खेति लगाउन’ घर आएको उनको पारिवारिक स्रोतले जनाएको छ । त्यस बेला आफूले ‘लामो समयदेखि तलब नपाएको’ भन्दै गुनासो गरेको र तलब पाएपछि काम छाडेर विदेश जाने योजना सुनाएको शर्माको परिवारले जानकारी दिएको छ ।
सिजी सिमेण्टमा तलबको समस्या नौलो होइन । यसअघि पनि पारिश्रमिक नपाएका कामदारले सिमेण्ट उद्योगमा तालाबन्दी गर्ने सम्मका घटना भएका छन् । गोरखापत्रले २०७९ असोजमा प्रकाशन गरेको एक समाचारमा पनि तीन महिनादेखि पारिश्रमिक नपाएपछि कामदारले उद्योगमा तालबन्दी गरेको उल्लेख छ । दशैँतिहारको समयमा पनि आफ्नो श्रमको मूल्य नपाएकाले तालाबन्दी गर्नु परेको भनेर एक कामदार हेमन्त नेपाललाई उर्दृत गर्दै समाचारमा जनाइएको छ ।
मंगलबारको उक्त दुर्घटनाका बारेमा सूचना पाएपछि बुधबार विहानै काठमाडौँबाट शर्माका परिवारजनहरु १७ जनाको टोली पाल्पा प्रस्थान गरेको छ । उनीहरु साँझसम्म घटनास्थल पुग्न नसकेका कारण मेसिनबाट शव ननिकालिएको प्रहरीले जनाएको छ । शव क्षतविच्छेद हालनमा हुनसक्ने पनि प्रहरीले बताएको छ । पारिवारिक स्रोतका अनुसार पनि शव क्षतविच्छेद भएको खबर आएकाले उतै ‘सदगद’ गरेर फर्कने तयारीमा ठूलो टोलि त्यसतर्फ गएको जनाएको छ ।
‘मेसिनभित्र कालोकालो देखिएको छ । स्पष्ट आकृति नदेखिएकाले शव क्षतविच्छेद भएको हुनसक्ने अनुमान गरिएको छ’, घटनास्थलमा अनुसन्धान गरिरहेका प्रहरी अधिकृतले भने, ‘मृतकका परिवार आएपछि मात्रै मेसिनबाट शव निकाल्ने योजना बनाइएको छ ।’ उक्त सिमेण्ट उद्योगमा कामदारको सुरक्षा प्रबन्धहरु प्रभावकारी नभएको प्रहरी स्रोतले जानकारी दियो । गत सालको साउन पहिलो साता पनि सिमेण्ट उद्योगभित्रको भर्याङ खस्दा १३ जना कामदार घाइते भएका थिए । क्लिङ्कर खस्ने स्थानमा पुराना इँटा हटाएर नयाँ इँटा राख्ने क्रममा भर्याङ खस्दा त्यस्तो घटना भएको जिल्ला प्रहरी कार्यालय पाल्पाले जनाएको छ ।
शर्माको मृत्युपछि उनको क्षतिपूर्ति र बीमा लगायतका विषयमा भने अहिले कुनै छलफल नभएको प्रहरीले जनाएको छ । आफन्तहरु आएपछि शव निकाल्ने र घटनाको विस्तृत अध्ययन गर्ने जिम्मा आफूहरुको भए पनि क्षतिपूर्ति र बीमा दाबीका विषयलाई प्रहरीले नहेर्ने ती अधिकारीले बताए ।
