वीरगञ्ज। पछिल्ला दुई आर्थिक वर्षमा राजस्व सङ्कलनमा लक्ष्य पूरा गर्न नसकेपछि वीरगञ्ज भन्सार कार्यालयको लागि राजस्व सङ्कलनको लक्ष्य घटाइएको छ। भन्सार विभागले चालु आर्थिक वर्ष २०८१/८२ का लागि वीरगञ्ज भन्सारको लक्ष्य करिब २७ अर्बले घटाएर रु दुई खर्ब १८ अर्बमा झारेको छ।

आर्थिक वर्ष २०८०/८१ मा भन्सार कार्यालयलाई रु दुई खर्ब ४५ अर्ब ८८ करोड राजस्व सङ्कलनको लक्ष्य दिइएको थियो, तर कार्यालयले मात्र रु एक खर्ब ५७ अर्ब ४० करोडको राजस्व सङ्कलन गर्न सक्यो। यसअघि, २०७९/८० मा पनि रु दुई खर्ब ६० अर्बको लक्ष्य राखिएकोमा ६० प्रतिशत मात्र अर्थात् रु एक खर्ब ५७ अर्ब सङ्कलन भयो।

नेपाल उद्योग वाणिज्य महासङ्घका सदस्य सुबोधकुमार गुप्ताले विभागले आवश्यकता भन्दा बढी महत्वाकाङ्क्षी लक्ष्य राखेकाले राजस्व सङ्कलनमा असफलता भएको टिप्पणी गर्नुभयो। “आयात घट्दो अवस्थामा यथार्थपरक लक्ष्य नबनाउँदा लक्ष्य पूरा गर्न नसकिने स्थिति आएको छ,” उहाँले बताउनुभयो।

वीरगञ्ज भन्सार कार्यालयका सूचना अधिकारी रघुलाल कर्णले पनि लक्ष्यअनुसारको राजस्व सङ्कलन नभएको पुष्टि गर्दै विभागले चालु आवको लक्ष्य घटाएको जानकारी दिनुभयो। “विगतका वर्षहरूमा लक्ष्यभन्दा कम राजस्व सङ्कलन भएकाले यो वर्ष विभागले सावधानीपूर्वक लक्ष्य निर्धारण गरेको देखिन्छ,” उहाँले भन्नुभयो।

विगतको सफलताका उदाहरणहरू हेर्दा, आव २०७८/७९ मा वीरगञ्ज भन्सारले रु दुई खर्ब ३ अर्बको लक्ष्य राखिएकोमा १०० प्रतिशतभन्दा बढी अर्थात् रु दुई खर्ब ४ अर्ब राजस्व सङ्कलन गर्न सफल भएको थियो। यस आधारमा, चालु आवमा पनि कार्यालयले थप प्रयास गर्ने र लक्ष्यअनुसार राजस्व सङ्कलन गर्न लागि पर्ने विश्वास गरिएको छ।