बारा | सिकेंद्र साह । बारा जिल्लाको सिम्रौनगढ नगरपालिका वडा नम्बर ६ मा रहेको नगर आँखा अस्पतालद्वारा आयोजित निःशुल्क आँखा शिविर सफलतापूर्वक सम्पन्न भएको छ। बिहान १० बजेबाट सुरु भएको यस शिविरमा २५० जना आँखाका रोगीहरूले आफ्नो आँखा जाँच गराए र निःशुल्क औषधि प्राप्त गरे।

शिविरमा सेवा प्रदान गर्ने आँखा विशेषज्ञ डा. दिलिप कुमार यादवले अहिलेको गर्मीको मौसममा मोतियाबिन्दु र आँखापाक्ने रोग बढी देखिएको बताएका छन्। भागवत यादव स्मृति प्रतिष्ठानले विगत तीन वर्षदेखि विभिन्न समय समयमा यस्ता शिविरहरू आयोजना गर्दै आइरहेको स्थानीय दिनेश प्रसाद गुप्ताले जानकारी दिए।

शिविरमा बिरगंजबाट अन्नपूर्ण सुपर स्पेसलिस्ट क्लिनिकका मृगौलारोग विशेषज्ञ डा. अनुराग प्रसाद सिंह, स्त्रीरोग विशेषज्ञ डा. श्वेता सिंह, छातीरोग विशेषज्ञ डा. सुनिल कुमार पटेल लगायतका चिकित्सकहरूले सेवा प्रदान गरे। उनीहरूले शहरी क्षेत्रभन्दा बढी ग्रामीण क्षेत्रमा यी रोगहरूको प्रकोप देखिएको र ५० वर्षभन्दा बढी उमेरका व्यक्तिहरूलाई बढी असर गर्ने बताए।

शिविरमा हाडजोर्नी विशेषज्ञ डा. सुरेन्द्र चौधरी सहितको टिमले पनि सिम्रौनगढका स्थानीय नागरिकहरूलाई सेवा प्रदान गरे। यस निःशुल्क शिविरले स्थानीय समुदायमा सकारात्मक प्रभाव पारेको छ।