वीरगंज | नोबेल पुरस्कार विजेता मोहम्मद युनुस मङ्गलबार राति बङ्गलादेशको अन्तरिम सरकार प्रमुखमा नियुक्त भएका छन्। राष्ट्रपति मोहम्मद शहाबुद्दीनले विवादास्पद आम निर्वाचनमार्फत गठन भएको १२ औँ संसद् विघटन गरेको केही घण्टापछि युनुसलाई नियुक्त गरेको बङ्गलादेशी पत्रिका न्यूएजले जनाएको छ।

शेख हसिनाको सरकार पतन भएको भोलिपल्ट बंगभवनमा बसेको संयुक्त बैठकमा युनुसलाई अन्तरिम सरकारको प्रमुखको रूपमा चयन गरिएको हो। यो बैठकमा युनुसलाई छनोट गर्ने सहमति गरेर नियुक्त गरिएको समाचारमा उल्लेख छ।

राष्ट्रपतिका प्रेस सचिव जोनाल आबेदिनले भनेका छन् कि अन्तरिम सरकारका बाँकी सदस्यहरूको बारेमा राजनीतिक दल र अन्य सरोकारवालासँग छलफलपछि निर्णय गरिनेछ। यसअघि युनुसको कार्यालयले आन्दोलनरत विद्यार्थीहरूले उनलाई अन्तरिम सरकारको नेतृत्व गर्न प्रस्ताव गरेको र उनले यो प्रस्ताव स्वीकार गरेको पुष्टि गरेको थियो।

यो नियुक्ति बङ्गलादेशमा राजनीतिक संक्रमणकालका लागि महत्वपूर्ण मानिएको छ। युनुसको नेतृत्वमा अन्तरिम सरकार गठन हुने भएपछि आगामी राजनीतिक दिशा र निर्वाचनको प्रक्रिया कसरी अगाडि बढ्नेछ भन्नेबारे बङ्गलादेशमा चासो बढेको छ।