वीरगंज | शहरी विकास कार्यालय वीरगञ्जमार्फत निजगढ स्मार्ट सिटी कार्यक्रम अन्तर्गत निजगढमा मापदण्ड विपरीत सडक निर्माण भएको पाइएको छ। कार्यालयले बज्रगुरु निर्माण कन्ट्रक्शन काठमाण्डौमार्फत नगरपालिकाको वडा नम्बर ६, ७, र ९ को विभिन्न क्षेत्रमा निर्माण गरिरहेको करिब ७ किमी सडक मापदण्ड विपरीत निर्माण भइरहेको हो।

निर्माण कम्पनीसँग भएको सम्झौतामा सडकमा परेका विजुली र टेलिफोन लाइनका पोल हटाएर सडक बाहिर गाढ्नु पर्ने प्रावधान भए पनि निर्माण कम्पनीले सडकको पेटी र नालाभित्रै पोल राखेर सडक निर्माण गरेको छ। साविकको सडक क्षेत्रभित्र परेका पोलहरू स्थानान्तरण नगरी निर्माण कम्पनीले सडक निर्माण गरेपछि स्थानीयले मापदण्डअनुसार सडक निर्माण गर्न माग गर्दै आएका छन्।

“सडक निर्माण गर्दा सडक, नाला र पेटीमा परेका पोलहरू हटाउनुपर्ने प्रावधान छ,” निजगढ नगरपालिका वडा नम्बर ७ का वडा सदस्य दिलबहादुर मगरले भन्नुभयो, “तर सम्झौताविपरीत ठेकेदारले सडक निर्माण कार्य जारी राखेको छ।” उहाँका अनुसार पहिले सडक किनारमा रहेका पोलहरू मध्ये अधिकांश पोल अहिले नालाभित्र र केही सडकको बिच भागमा समेत परेका छन्। पटकपटक सुझाव दिँदा पनि कम्पनीले सडक र नालामा परेका पोल हटाउने बारेमा चासो नदेखाएको उहाँले सुनाउनुभयो।

स्मार्ट सिटी कार्यक्रम अन्तर्गत निजगढ ९ को तेर्सा लाइन, निजगढ ७ को माझी टोलदेखि भ्याकुरे टोल हुँदै योजना टोलसम्म र निजगढ ६ को धियाल टोलबाट राममन्दीरसम्म निर्माण भएको सो सडकमा परेका अधिकांश पोलहरूलाई यथावत राखेर सडक कालोपत्रे गरिएको छ। यसले नगरको सुन्दरता बिगार्नुको साथै दुर्घटना जोखिमसमेत बढाएको वडा सदस्य थापा मगरले बताउनुभयो।

“नालामा परेको पोल खिया लागेर छिट्टै ढल्नसक्छ र यसबाट धनजनको क्षति हुनसक्छ,” उहाँले भन्नुभयो, “मापदण्ड विपरीत सडक निर्माणले नगरको सुन्दरतामात्रै होइन, जनधनको असुरक्षा समेत बढाएको छ।”

यसअघि मापदण्ड विपरीत सोही सडकमा सोलार बत्ती जडान गरिएको भन्दै स्थानीयले विरोध जनाएपछि कम्पनी मापदण्डअनुसार बत्ती जडान गर्न बाध्य भएको थियो। एउटा पोलबाट अर्को पोलसम्म ५०-६० मिटरको दुरीमा बत्ती जडान गर्नुपर्ने प्रावधान भए पनि कम्पनीले १ सय मिटरदेखि १५० मिटरसम्मको दुरीमा राख्ने प्रयास गरेपछि स्थानीयले विरोध गरेका थिए।