नयाँ दिल्ली । दिल्लीको एक कोचिङ इन्स्टिच्युटको बेसमेन्टमा पानी भरिँदा तीन जनाको मृत्यु भएको छ । मिडिया रिपोर्टका अनुसार फेला परेको शव दुई छात्रा र एक छात्रको रहेको छ ।

यो दुर्घटना दिल्लीको राजेन्द्र नगर क्षेत्रमा रहेको यूपीएससी कोचिङ सेन्टरमा शनिबार भएको हो । तीनै जना विद्यार्थी युपीएससी सिभिल सर्भिस परीक्षाको तयारी गरिरहेका थिए ।

मध्य दिल्लीका डीसीपी एम हर्षवर्धनले मृत्यु भएका सबैको शव निकालिएको बताएका छन्। यस सम्बन्धमा कानुनी प्रक्रिया पूरा भइरहेको छ ।

बेसमेन्टबाट लगातार पम्पमार्फत पानी निकाल्ने काम भइरहेको पनि उनले बताए । बेसमेन्टमा फसेका १३–१४ विद्यार्थीको उद्धार गरिएको छ । तीमध्ये तीन जनालाई अस्पताल पठाइएको छ ।