वीरगन्ज | पछिल्लो केहि वर्षयता लागू औषध ओसारपसारको ट्रान्जिट प्वाइन्ट नै बन्दै गएकोे वीरगन्ज नाकामा गत वर्ष भने लागू औषधको ओसार पसारको अवैध कारोबारमा कमी आएको प्रहरीको तथ्यांकले देखाएको छ ।

जिल्ला प्रहरी कार्यालय पर्साले उपलब्ध गराएको लागू औषधको वार्षिक प्रगति विवरणसम्बन्धि तथ्यांकमा गत आर्थिक वर्ष २०८०/८१ मा अघिल्लो आर्थिक वर्ष २०७९/८० को तुलनामा लागू औषधको ओसारपसार र त्यसमा संलग्न रही पक्राउ परेकाहरुको संख्या घटेको उल्लेख छ ।

अघिल्लो आर्थिक वर्ष २०७९/८० मा वीरगन्ज नाकाबाट प्रहरीले लागू औषध गाँजा १ हजार १६५ केजी,चरेस १ सय १४ केजी , खैरो हेरोइन (ब्राउन सुगर) ५५ सय ८१ ग्राम बरामद गरेको थियो । यस्तै फेनरागन ७ हजार ४८९ पिस ,डाइजेल्याब १० हजार ४८१ पिस ,नुर्फिन ८ हजार ८४० पिस र नाइट्रोभेट २७ हजार ७४३ पिस र कोरेक्स ४ हजार ५६८ बोत्तल प्रहरीले बरामद गरेको थियो ।

तर गत आर्थिक वर्ष २०८०/८१ मा प्रहरीले वीरगन्ज नाकाबाट लागू औषध गाँजा ४ सय १० केजी, चरेस ९१ केजी , खैरो हेरोइन (ब्राउन सुगर) ७ सय ५७ ग्राम बरामद गरेको छ । यस्तै लागू औषध फेनरागन ६ हजार ३१६ पिस ,डाइजेल्याब ६ हजार ३३० पिस ,नुर्फिन ६ हजार ३१६ पिस, नाइट्रोभेट ११ हजार ५६३ पिस र कोरेक्स १ हजार ३७० बोत्तल प्रहरीले बरामद गरेको पर्साका प्रहरी उपरीक्षक कुमोद ढुंगेलले जानकारी दिए ।

जिल्ल प्रहरी कार्यालय पर्साका अनुसार, आर्थिक वर्ष २०७९/८० मा लागू औषधको ओसपसार र कारोबारमा संलग्न ४ सय ३७ जना पक्राउ परेका थिए ।यस्तै उक्त आर्थिक वर्षमा जिल्ला प्रहरी कार्यालय पर्सामा लागू औषधसम्बन्धि ३ सय २ वटा मुद्धा दर्ता भएको थियो ।तर गत आर्थिक वर्ष २०८०/८१ मा लागू औषधको ओसपसार र कारोबारमा संलग्न २ सय ८० जनामात्र पक्राउ परेका छन् । यस्तै प्रहरी कार्यालयमा लागू औषधसम्बन्धि २ सय ४ वटामात्र मुद्धा दर्ता भएको प्रहरी उपरीक्षक ढुंगेलले जानकारी गराए।

प्रहरी उपरीक्षक ढुंगेलले वीरगन्ज नाकामा प्रहरीले लागू औषध ओसार गर्ने विरुद्ध सकृयता र निगरानी बढाएका कारण लागू औषधको ओसारपसारको गैरकानुनी कारोबारमा कमी आएको हुनसक्ने बताए ।यसका साथै वीरगन्जसंगै जिल्लाका अन्य स–साना नाकामापनि प्रहरीको सकृयता र निगरानी बढेपछि लागू औषध कारोबारीहरुले वीरगन्ज नाका छाडेर अन्य जिल्लाका नाका प्रयोग गरेको हुनसक्ने उनको आशंका छ ।

यता लागू औषध दुव्र्यसन विरुद्ध वर्षौदेखि काम गर्दै आएको गैरसरकारी संस्था सानो पाइलाका संस्थापक कञ्चन झाले भने वीरगन्ज नाकाबाट गत वर्ष लागू औषधको ओसार पसारको गैर कानूनी कारोबारमा कमी आएको प्रहरीको तथ्यांकले देखाएपनि लागू औषधको सेवनकर्ताको संख्या भने बढ्दो क्रममा रहेको बताए ।

उनले भने,‘प्रहरीले बरामद गरेको लागू औषधको परिमाण र ओसार पसारमा संलग्न रही पक्राउ परेकाहरुको संख्या घटेको देखिएपनि सेवनकर्ताको संख्या भने समग्र रुपमा बढ्दो क्रममा छ ।शायद वीरगन्ज नाकामा प्रहरीको निगरानी बढेका कारणले ओसार पसारमा संलग्न कारोबारीहरु अरु नाकामा डाइभर्ट भएको हुनसक्छ ।’