वीरगञ्ज । पर्सा प्रहरीले गत आर्थिक वर्षमा करिब ५३ करोड रुपैयाँ मूल्य बराबरको अवैध सामान बरामद गरेको छ। जिल्ला प्रहरी कार्यालय पर्साका प्रमुख कुमोध ढुङ्गेलका अनुसार, प्रहरीले भन्सार छली तथा बिलबीजक नभएका सामानमाथि निगरानी बढाएपछि बरामद हुने समानको संख्या अघिल्लो आवको तुलनामा बढेको छ।
ढुङ्गेलले भने, “प्रहरीको सक्रियताकै कारणले अघिल्लो आवको तुलनामा गत आवमा अवैध रुपमा भन्सार छली तथा बिलबीजक नभएका सामान बरामदमा उल्लेखनीय वृद्धि भएको छ। चोरी–तस्करी गरेर भित्र्याएको सामानलाई पक्राउ गरेर वीरगञ्ज भन्सार कार्यालयलाई बुझाउँदै आइरहेका छौँ भने बिलबीजक अनुसार नभएको सामानलाई राजस्व अनुसन्धान कार्यालय पथलैयामा बुझाउँदै आइरहेका छौँ।”
पर्सा प्रहरीका अनुसार, आर्थिक वर्ष २०७९/८० मा अवैध चोरी–तस्करी र बिलबीजक नभएका कूल ४८ करोड ९ लाख ६४ हजार ६ सय ४६ रुपैयाँ मूल्य पर्ने सामान वीरगञ्ज भन्सार कार्यालय र राजस्व अनुसन्धान कार्यालय पथलैयामा बुझाइएको थियो। यस्तै, आर्थिक वर्ष २०७८/७९ मा भने २३ करोड ९४ लाख ४६ हजार ८ सय २५ रुपैयाँ मूल्य पर्ने सामान बरामद गरिएको थियो।
हुन्डी कारोबारमा पनि सक्रियता
पर्सा प्रहरीले गत आर्थिक वर्षमा हुन्डी कारोबारमा संलग्न १७ जना कारोबारीबाट ६१ लाख २४ हजार ७ सय रुपैयाँ जफत गरेको छ। प्रहरी नायब उपरीक्षक दीपक भारतीले अघिल्लो आवभन्दा गत आवमा हुन्डी कारोबारमा पक्राउ पर्ने सङ्ख्यामा कमी आएको जानकारी दिए।
गत आवमा हुन्डी कारोबारमा संलग्न रहेको भन्दै १७ जनाबाट १ करोड ९३ लाख ६६ हजार ३ सय रुपैयाँ बरामद गरिएको थियो भने आर्थिक वर्ष २०७८/७९ मा हुन्डी कारोबारमा संलग्न १४ जनाबाट १ करोड ६५ लाख १३ हजार ६ सय २० रुपैयाँ सहित पक्राउ गरिएको थियो।
पर्सा जिल्ला १०७ किलोमिटर क्षेत्रफल भारतसँग सीमा जोडिएको छ, जसले गर्दा सीमा क्षेत्रमा अवैध कारोबार र तस्करीका घटनाहरु बढी हुने गर्छन्। प्रहरीको सक्रियता र निगरानीका कारण अवैध गतिविधिहरुमा केही हदसम्म कमी आएको देखिन्छ।