वीरगन्ज | वीरगन्ज महानगरपालिकाका मेयर राजेशमान सिंहले वर्षातको समयमा हुनसक्ने डुबानलाई तत्काल निकास दिन तथा फोहोर व्यवस्थापनमा कुनै पनि सम्झौता नगर्न ३२ वटै वडाका सफाइकर्मीलाई निर्देशन दिएका छन्।

वर्षातको समयमा नाला जाम भएर हुन सक्ने डुबानको समस्यालाई समाधान गर्न ३२ वटै वडामा रहेका नालाहरु आजै देखि पूर्णरुपमा सफाई गर्न मेयर सिंहले सफाइकर्मीका नाइकेहरुलाई निर्देशन दिएका हुन्।

वीरगन्जको सफाईमा आफूले कसैसँग कुनै सम्झौता नगर्ने भन्दै उनले त्यसका लागि फोहोर संकलन तथा व्यवस्थापनमा विशेष ध्यान दिनपनि सफाइकर्मीलाई निर्देशन दिए ।

वीरगन्जमा फेरि फोहोर बढेकोमा चिन्ता व्यक्त गर्दै उनले फोहोर व्यवस्थापनमा हेलचेक्रयाई गर्ने सफाइकर्मीलाई कारबाही गरिने चेतावनीपनि दिए ।’मलाई ठूलो चिन्ता छ, वीरगन्जमा फेरि फोहोर बढ्यो’ उनले भने, ‘यसको समाधान मलाई चाडो चाहियो, अन्यथा म सबैलाई कारबाही गर्छु ।’

महानगरपालिकाका प्रमुख प्रशासकीय अधिकृत मातृका भट्टराईले सफाइमा कुनै पनि गुनासो नआउने गरि काम गर्न निर्देशन दिँदै थप जनशक्तिको आवश्यक परे त्यो पनि व्यवस्थापन गर्न आफूहरु तयार रहेको बताए ।

मंगलबार बिहान मेयर सिंहकाे कार्यकक्षमम भएको बैठकमा योजना प्रमुख अवधेश साह, सरसफाई शाखा प्रमुख सर्फूद्दिन मियाँ, वातावारण शाखा प्रमुख राकेश साह, महानगर प्रमुखका जनसम्पर्क सल्लाहकार नवराज फुयाँल, महानगरको सरसफाई संयोजक प्रकाश खेतान, ३२ वटै वडाका सफाईकर्मीका नाइकेहरुको सहभागिता रहेको थियो ।