बारा । बाराको जीतपुरसिमरा उपमहानगरपालिकामा नेकपा एमालेबाट निर्वाचित जनप्रतिनिधि सहभागी नभएपछि नगरसभा स्थगित गरिएको छ। नगरसभामा १२५ जना सदस्य मध्ये ४५ जना मात्रै उपस्थित भएकाले गणपुरक संख्या नपुगेको हो।

नगरसभामा उपस्थित नभएका एमालेका कार्यपालिका सदस्यहरुले नगर प्रमुख राजन पौडेलले वडाको बजेट मनपरी ढंगले विनियोजन गरेको आरोप लगाएका छन्। जीतपुर सिमरा उपमहानगरमा नेकपा एमालेबाट निर्वाचित वडाध्यक्षको विरोध र तोडफोडपछि नगर सभा स्थगित भएको छ । नगर प्रमुखले नीति, कार्यक्रम तथा बजेटमा आफूखुशी गरेको भन्दै एमालेका वडा अध्यक्षहरु असन्तुष्ट छन्। यसपटक २४ वटा वडाका लागि २८ करोड ३२ लाख रुपैयाँ मात्रै छुट्याइएकोले उनीहरु असन्तुष्ट भएका हुन्।

नगरसभामा एमालेका उपप्रमुख भोला अधिकारीसहित अन्य कार्यपालिका सदस्यहरु उपस्थित भए पनि शान्तिपूर्ण रूपमा बस्न नसकी होहल्ला गरेका थिए। बिहान ११ बजे सुरु हुने भनिएको नगरसभा २ बजेतिर एमालेका सदस्यहरु दलबलसहित पुगेका थिए। वडा नं. ७ का अध्यक्ष सुनिल गुप्ताले नगरसभा सदस्य बाहेकका व्यक्तिहरु ल्याई विवाद गरेको आरोप पनि लागेको छ।

प्रशासकीय अधिकृत चेतकुमार पोखरेलका अनुसार नगरसभा स्थगित गर्नुको कारण गणपुरक संख्या नपुग्नु हो। उनले भने, ‘एमालेका जनप्रतिनिधि ढिलो आउनुभयो, आएपछि पनि शान्तसँग बस्नुभएन, होहल्ला गर्न थाल्नुभयो, वडा अध्यक्षले आसेपासे समेत लिएर आउनुभयो, कुर्सीमा लात हान्नेसम्मको क्रियाकलाप भयो। नगरसभामा आएर पनि उपस्थितिमा हस्ताक्षर गर्नुभएन, त्यसैले गणपुरक संख्या पुगेन।’

जीतपुरसिमरा उपमहानगरपालिकाको नगर सभा सञ्चालन नियमावली, २०७५ अनुसार पहिलो पटक आह्वान गरिएको नगरसभामा सदस्य संख्याको ५० प्रतिशत भन्दा बढी सदस्य उपस्थित हुनुपर्ने प्रावधान छ। गणपुरक संख्या नपुगेमा तीन दिन भित्र अर्को बैठकका लागि सूचित गर्नुपर्ने र त्यसमा पनि गणपुरक संख्या नपुगेमा दुई दिनभित्र नगर सभा बस्नेगरी सूचना जारी गर्नुपर्ने व्यवस्था छ। यदि फेरि पनि गणपुरक संख्या नपुगेमा कम्तीमा २५ प्रतिशत सदस्यहरुको उपस्थितिमा नगरसभा बस्न सकिने नियमावलीमा उल्लेख छ।

वडा नं. २० का वडा अध्यक्ष रसुल मियाँले अझैसम्म पदभार ग्रहण गर्न नपाएको र नगर प्रमुख पौडेलले समन्वय नगरिदिएको आरोप पनि एमालेका तर्फबाट लगाइएको छ। उपप्रमुख भोला अधिकारीले तयारी गर्नुपर्ने कुराहरु नगरिएकोले कार्यसम्पादनमा समस्या भएको बताए।

नगर प्रमुख राजन पौडेलले भने गणपुरक संख्या नपुगेकोले नगरसभा स्थगित गर्नुपरेको जानकारी दिए।