वीरगंज | वीरगन्जका बजारमा विषादी प्रयोग गरी पकाइएका आँप छ्यापछ्याप्ती बिक्री भइरहेको पाइएको छ। मानव स्वास्थ्यका लागि हानिकारक रासायनिक पदार्थ कार्बाइड हालेर पकाइएको आँप यहाँको प्रत्येक बजारमा खुलेआम बिक्री वितरण भइरहेको बजार व्यवस्थापन समितिका पदाधिकारीहरुद्वारा अनुगमन गर्ने क्रममा भेटिएको छ।

वीरगञ्ज महानगरपालिकाको बजार व्यवस्थापन समितिको संयोजक तथा उपप्रमुख इम्तियाज आलमको निर्देशनमा शुक्रबार फलफूलको थोक पसलमा अनुगमन गरिएको थियो।

वडा ८ गहवा रेल्वेरोडस्थित शंकरमोच फुट ट्रेडर्समा अनुगमन गर्ने क्रममा आँपमा विषादी प्रयोग भएकाले आइन्दा त्यस्तो विषादीयुक्त आँप तथा फलफूल बिक्री वितरण नगर्न र गरेको पाइए कानुनी कारबाही गरिने निर्देशन दिइएको छ। साथै मूल्यसूची अपडेट नरहेकाले सबैले देख्ने गरी मूल्यसूची राख्न पनि बजार अनुगमनको टोलीले निर्देशन दिएको छ।

यसैगरी, वीरगन्ज रेल्वेरोडस्थित चाँदनी फुट ट्रेडर्समा पनि टोलीले अनुगमन गर्ने क्रममा वीरगन्ज महानगर पालिकाको व्यवसाय प्रमाणपत्र नलिएकाले ३ दिनभित्र व्यवसाय प्रमाणपत्र लिन र कार्बाइट विषादी प्रयोग गरेको आँप तथा फलफूल बिक्री वितरण गरेकाले अब बिक्री वितरण गरेको पाइएमा नियमानुसार कारबाही गरिने खाद्य अनुसन्धान अधिकृत विपिनकुमार लाल दासले बताए।

अनुगमनमा वीरगञ्ज महानगरपालिकाका उपभोक्ता हित संरक्षण मञ्च नेपालका अजितकुमार भुजेल, गुणस्तर तथा नाप तौल कार्यालयका सुशान्त चौधरी, आनन्द गुप्ता, सन्दिपकुमार चौधरी, वाणिज्य आपूर्ति तथा उपभोक्ता संरक्षण कार्यालय वीरगन्जका मधुरेशप्रसाद साह, वीरगन्ज उद्योग वाणिज्य संघका मनोजकुमार दास, घरेलुु तथा साना उद्योग वीरगन्जका सन्जय महतो, प्रहरी सहायक निरीक्षक वृजकिशोर यादव, सशस्त्र प्रहरी हबल्दार शशी देवकोटा, वीरगन्ज महानगरपालिकाका नगर प्रहरीहरुको समेत सहभागिता रहेको थियो।

विषादी हालेर पकाइएका आँप खाँदा मानव स्वास्थ्यमा गम्भीर असर गर्ने चिकित्सकले बताएका छन्। बढ्दो तापक्रमले दैनिकी कष्टकर बनिरहेका बेला विषादी हालेर पकाइएका आँप खाँदा स्वास्थ्यमा थप असर गर्ने डा. अशोक दासले बताए। ‘कार्बाइड हालेर पकाइएको आँप खाँदा तत्काल पेट दुख्ने, बान्ता हुनेजस्ता स्वास्थ्य समस्या देखिन्छ’, डा दासले भने, ‘औषधि हालेर जबर्जस्ती पकाइएको आँपले गर्मीमा थप समस्या पार्छ।’

चिकित्सकले विषादी प्रयोग गरेको आँप खाँदा दीर्घकालीन रूपमा मानसिक रोग, टाउको दुख्ने, अनिद्रा, स्मरण शक्तिमा ह्रास, मस्तिष्क, आँखा र मिर्गौलामा असर पर्न सक्ने भन्दै सचेत गराएका छन्।