आईसीसी टी-२० विश्वकप क्रिकेटमा बुधबार बिहान हुने भनिएकाे नेपाल र श्रीलंकाबीचको खेल वर्षाको कारण रद्द भएको छ ।
अमेरिकाको फ्लोरिडास्थित सेन्ट्रल ब्रोवार्ड रिजनल पार्क स्टेडियममा नेपाली समयअनुसार बिहान ५ः१५ बजे सुरु हुनुपर्ने खेल वर्षाका कारण रद्द भएको हो ।
खेल रद्द भएपछि दुवै टोलीले १-१ अंक बाँडेका छन् । खेल रद्द हुँदा दुवै टोलीलाई अर्को चरणमा पुग्न कठिन हुने देखिएको छ ।
नेपाल समूह चरणको पहिलो खेलमा नेदरल्यान्ड्ससँग ६ विकेटले पराजित भएको थियो भने श्रीलंका पहिलो खेलमा दक्षिण अफ्रिकासँग ६ विकेट र दोस्रो खेलमा बंगलादेशसँग २ विकेटले पराजित भएको थियो ।
अब समूह चरणका बाँकी दुई खेल खेल्न नेपाली टोली वेस्ट इन्डिज जानेछ । वेस्टइन्डिजको सेन्ट भिन्सेन्टमा नेपालले यही जेष्ठ ३२ गते दक्षिण अफ्रिकासंग र आगामी असार २ गते बंगलादेशसँग खेल्नेछ ।
