वीरगञ्ज । वीरगञ्जमा एक पुरुषको शव फेला परेको छ । वीरगञ्ज १६ स्थित शंकराचार्य गेट नजिकको खुला चौरमा अन्दाजी ३० वर्षको जस्तो देखिने पुरुषको शव फेला परेको प्रहरीले जनाएको छ।

आइतबार साँझ खुला चौरमा एक जना व्यक्ति मृत अवस्थामा फेला परेको सूचना प्राप्त भएपछि प्रहरी टोली घटनास्थलमा पुगेको थियो। मृत व्यक्तिले कालो रंगको सर्ट, निलो रंगको टिसर्ट, कालो रंगको जिन्स पाइन्ट र खैरो रंगको जुत्ता लगाएको अवस्थामा फेला परेको जिल्ला प्रहरी कार्यालय पर्साले जनाएको छ।

शवलाई मुचुल्का गरी नारायणी अस्पतालको शवगृहमा राखिएको छ। मृतकको अनुहारमा रगत देखिएको हुँदा कसैले हत्या गरेर फालेको हुन सक्ने आशंका प्रहरीले गरेको छ।

घटनाको अनुसन्धान जारी रहेको प्रहरीले जनाएको छ।