वीरगञ्ज । मधेस प्रदेशमा चार पार्टीले सरकार बनाउने प्रयास थालेका छन् । नेकपा एमाले, नेकपा माओवादी केन्द्र, जनमत पार्टी र लोकतान्त्रिक समाजवादी पार्टी (लोसपा) ले गठबन्धन सरकार बनाउने भएका हुन् ।

सोही अनुसार आइतबार एमाले र माओवादी केन्द्रले मधेस सरकारलाई दिएको समर्थन फिर्ता लिँदै बाहिरिएको छ । माओवादीबाट मन्त्री बनेका भरत प्रसाद साह र युवराज भट्टराईले आइतबार मुख्यमन्त्री सरोजकुमार यादवलाई राजीनामा बुझाएका थिए । ‘हाम्रोबाट भरतप्रसाद साहको मुख्यमन्त्रीमा दाबी रहनेछ,’ भट्टराईले भने ।

यस्तै, एमालेका मन्त्रीहरूले पनि राजीनामा बुझाएका छन् । गृह, सञ्चार तथा कानून मन्त्रीमा राजकुमार लेखी, स्वास्थ्य तथा जन संख्यामन्त्रीमा शत्रुधनसिंह कोइरी र शिक्षा तथा संस्कृति मन्त्री प्रमोद जयसवाल, स्वास्थ्य तथा जनसङ्ख्या राज्यमन्त्री केशव राय चैत १० गते मन्त्रीमा नियुक्त भएका थिए । स्वतन्त्र सांसद जयसवाल केही दिन अगाडि मात्र एमालेमा प्रवेश गर्दै शिक्षा मन्त्री नियुक्त भएका थिए । ‘हामीले सरोजकुमार यादवलाई दिएको समर्थन फिर्ता लिएका छौँ,’ एमाले सांसद राजकुमार लेखीले भने, ‘अब नयाँ सरकार बन्छ ।’

एमाले २५ र माओवादीका ९ गरी ३४ जनाको समर्थन फिर्ता भएसँगै जनता समाजवादी पार्टी नेपाल (जसपा नेपाल) बाट मुख्यमन्त्री बनेका सरोजकुमार यादव अल्पमतमा परेका छन् । अब उनले संसद्मा विश्वासको मत लिनको लागि एक महिनाको समय पाउँछन् । यदि नपाए उनको सरकार ढल्नेछ ।

उपेन्द्र यादव नेतृत्वको जसपा नेपाल विभाजन भएर अशोक राईको नेतृत्वमा जनता समाजवादी पार्टी गठन भएपछि मधेस प्रदेश सरकारबाट एमाले र माओवादी बाहिरिएका हुन् ।

यसैबिच चार दलले नयाँ सरकार निर्माण थालेका छन् । ‘एमाले, माओवादी, जनमत र लोसपा गरी चार पार्टी मिलेर सरकार बनाउने सहमति भएको छ,’ माओवादी सांसद युवराज भट्टराईले भने, ‘नेतृत्व प्रस्ट भइसकेको छैन, अहिलेसम्म माओवादी र जनमतबाट दाबी छ ।’

मधेस प्रदेशमा एमाले सबैभन्दा ठूलो दल हो । एक सय ७ सदस्यीय प्रदेश सभामा एमालेका सभामुखसहित २५ सांसद छन् । जनमतको १३ सांसद छन् । यसै गरी माओवादी केन्द्रको ९ सांसद हुँदा लोसपाको ९ सांसद नै छन् । यसै गरी नेकपा एकीकृत समाजवादीका ७ सांसद छन् ।

जुन सरकार बनाउन पर्याप्त बहुमत हो । एमालेका सांसद राजकुमार लेखीले माधवकुमार नेपाल नेतृत्वको नेकपा एकीकृत समाजवादी पार्टी समेत नयाँ गठबन्धनमा सहभागी हुने बताए । ‘पाँच दल मिलेर मधेसमा सरकार बनाउँछौँ, नेतृत्वमा सबैभन्दा ठूलो दल भएकोले एमालेको स्वाभाविक दाबी हुने नै भयो,’ लेखीले भने, ‘माओवादी र जनमतको पनि दाबी छ ।’

एमाले संसदीय दलका नेता सरोजकुमार यादव, माओवादी केन्द्रका संसदीय दलका नेता भरतकुमार साह र जनमत पार्टीका संसदीय दलका नेता महेश प्रसाद यादवले मुख्यमन्त्रीमा दाबी गरेका छन् । नेतृत्वमा दाबी भए पनि मिलेर सरकार बनाउने लेखीले बताए ।

जसपाले २०७४ सालमा पूरै कार्यकाल सरकारको नेतृत्व गरेको थियो । यस पटक पनि केन्द्रीय गठबन्धन भत्किने र नयाँ बन्दा समेत जसपाको सरकार जोगिएको थियो । १९ सदस्यीय जसपामा विभाजन आएपछि पहिलो पटक सरकार ढल्ने भएको हो ।

उता, अशोक राई नेतृत्वको जनता समाजवादी पार्टीकी नेतृ रेणु यादवले मधेस प्रदेशबाट बढीभन्दा बढी सांसदहरू आफूहरूतिर खुल्ने दाबी गरेकी छन् । ‘सरकारको नेतृत्व नै हामी गर्न सक्छौँ, छलफल चलिरहेको छ,’ उनले आइतबार अपराह्न भनिन् ।