वीरगंज । मधेश प्रदेश सरकारबाट माओवादी केन्द्रले समर्थन फिर्ता लिने भएको छ । जनता समाजवादी पार्टी नेपाल विभाजन भइसकेको अवस्थामा त्यो पार्टीले सरकारको नेतृत्व गर्ने नैतिक आधार नरहेको भन्दै माओवादी केन्द्रले समर्थन फिर्ता लिने तयारी गरेको हो ।

स्रोतका अनुसार माओवादी केन्द्रले मधेश सरकारबाट आजै मन्त्री फिर्ता बोलाउने र सरकारबाट समर्थन फिर्ता लिने बताइएको छ ।

माओवादी केन्द्रका नेता एवं मधेश प्रदेश संसदीय दलका नेता भरत साहले आफूहरू केन्द्रको निर्देशनको पर्खाइमा रहेको र निर्देशन आउने बित्तिकै फिर्ता हुने बताए ।

माओवादी केन्द्रबाट मधेश सरकारमा दुई जना मन्त्री छन् । प्रदेशसभा सदस्य युवराज भट्टराई समीर उद्योग मन्त्री छन् भने संसदीय दलका नेता भरत साहलाई वन मन्त्रालयको जिम्मेवारी दिएको छ । तर साहले सो मन्त्रालय सम्हालेका छैनन् ।

मुख्यमन्त्री सरोज यादवले विश्वास मत लिने बेला माओवादी केन्द्रलाई अर्थ मन्त्रालय दिने सहमति गरेका थिए । तर वन मन्त्रालय दिएपछि माओवादी रुष्ट छ ।

मधेश प्रदेशमा सरकार गठनका लागि ५४ सांसदको समर्थन चाहिन्छ । जसपाका यादव नेतृत्वको सरकारलाई अहिले एमाले, माओवादी, नेकपा (एस) र लोसपाको समर्थन छ । एमालेका २५, माओवादीका ९, नेकपा (एस)का ७ र लोसपाका ८ सांसद छन् ।

जसपा नेपालका १९ जना सांसद छन् । सो पार्टी विभाजन भएपछि कति जना सांसद अशोक राईको पक्षमा जान्छन् भन्ने अहिलेसम्म टुङ्गो लागेको छैन ।