वीरगन्ज | पर्साको ठोरी नाकामा बर्षौदेखि बन्द अवस्थामा रहेको ठोरी छोटी भन्सार कार्यालय बुधबारदेखि पुनः सञ्चालनमा आउने भएको छ ।

पर्सा जिल्ला कै दोस्रो नाका ठोरीमा अवस्थित छोटी भन्सार कार्यालयको नयाँ भवन निर्माण गरि स्तरोन्नत्ती गरिएको वर्षाै बितिसक्दापनि भन्सार विभागले कर्मचारीको व्यवस्थापन नगरिदिदाँ उक्त छोटी भन्सार कार्यालय लामो समय देखि बन्द अवस्थामा थियो ।

तर हालै संघीय सरकारको मन्त्रिपरिषद बैठकले ठोरी छोटी भन्सार कार्यालय पुन सञ्चालनमा ल्याउने निर्णय गरेकाले बुधबारदेखि ठोरी छोटी भन्सार कार्यालय पुनः सञ्चालनमा ल्याउन लागिएको वीरगन्ज भन्सार कार्यालयका सूचना अधिकारी रघुलाल कर्णले जानकारी दिए ।

उनका अनुसार, मन्त्रिपरिषदको निर्णय बमोजिम अर्थ मन्त्रालयको निर्देशनमा ठोरी छोटी भन्सार कार्यालयमा वीरगन्ज भन्सार कार्यालयले नायब सुब्बा अभिषेक सिंहसहित दुई जना कर्मचारी खटाइसकेको र बुधबार बिहान एक औपचारिक कार्यक्रम गरेर भन्सार कार्यालय पुनः सञ्चालनमा ल्याउन लागिएको हो।

बुधबारको कार्यक्रममा भन्सार विभागका महानिर्देशक डुण्डी प्रसाद निरौला, पर्साका प्रमुख जिल्ला अधिकारी दिनेश सागर भुसाल, वीरगन्ज भन्सार कार्यालयका प्रमुख भन्सार प्रशासक डिलाराम पन्थी लगायतको विशेष उपस्थिती रहने कर्णले मधेसखबरलाई जानकारी दिए ।

यता ठोरी गाँउपालिकाका अध्यक्ष लाल बहादुर श्रेष्ठलेपनि ठोरी छोटी भन्सार कार्यालय बुधबारदेखि पुनः सञ्चालनमा ल्याउन लागिएको बताए ।उनले भने,‘ बुधबार बिहान ११ बजे ठोरी भन्सार कार्यालय परिसरमै एक औपचारिक कार्यक्रम हुदैंछ । कार्यक्रममा स्तरोन्नत्ती गरिएको भवनको भन्सार विभागका महानिर्देशकले समुद्घाटन गर्नु हुनेछ । भवनको समुद्घाटनसंगगै भन्सार कार्यालय पुनः सञ्चालनमापनि आउनेछ।’

यसअघि गत माघ २७ गते नै तत्कालीन अर्थमन्त्री रामशरण महत आँफै ठोरीमा आएर ठोरी छोटी भन्सार कार्यालयको समुद्घाटन र पुनः सञ्चालन गर्ने कार्यक्रम तय गरिएको थियो । तर उक्त कार्यक्रम अन्तिम समयमा आएर बिना कारण स्थगीत भएको थियो ।

पर्साको ठोरी गाउँपालिका तथा चितवनको माडी नगरपालिका र भरतपुर महानगरपालिकाका जनप्रतिनिधीहरुको संयुक्त टोलीले काठमाडौंस्थित अर्थमन्त्रालय, भन्सार विभाग लगायतका निकायमा पटकपटक पुगेर ठोरी छोटी भन्सार पुनः सञ्चालनका लागि दबाबसहितको आग्रह गर्दै आएका थिए ।

यता लामो समयको प्रतिक्षापछि ठोरी भन्सारको स्तरोन्नतिसंगगै पुनः सञ्चालनमा आउने खबरले ठोरीबासी खुसी भएका छन् । लामो समयदेखि बन्द रहेको भन्सार चल्ने भएपछि सिमावर्ती भारतीय बजारबाट किनमेल गरेर ल्याइने सामानको भन्सार राजश्व तिर्न अब वीरगन्ज नै धाउनु पर्ने बाध्यता ह्टने ठोरी बजारका होटल व्यवसायी रामशरण लामिछानेले मधेस खबरलाई बताए ।यस्तै ठोरीमा दैनिक सयौंको संख्यामा भारतीय पर्यटक आउने गरेको र उनिहरुलाई नेपालको जुनसुकै स्थानमा आवागमनमा समेत गाडी भन्सार गरी जान सकिने भएको हुँदा पर्यापर्यटनमा समेत यस कार्यले प्रत्यक्ष टेवा पुग्ने अपेक्षा गरिएको ठोरीका युवा अगुवा प्रकाश खनालले बताए ।