बारा । बारामा ठूलो परिमाणमा लागूऔषध सहित एक जना पक्राउ परेका छन् । पक्राउ पर्नेमा रौतहटको मौलापुर नगरपालिका – ३ गम्हरीया घर भएका २० वर्षीय अनिल बैठा रहेका छन् ।

बाराको जितपुरसिमरा उपमहानगरपालिका – १ पथलैयाबाट बैठालाई गत शुक्रवार राति लागूऔषधसहित पक्राउ गरिएको जिल्ला प्रहरी कार्यालय बाराले जनाएको छ ।

प्रहरीका अनुसार रौतहटको मौलापुरबाट काठमाडौँ जाँदै गरेको प्र. ०३–००१ ख २७०१ नम्बरको रात्रि बसलाई पथलैयामा प्रहरीले रोकेर चेकजाँच गरेको थियो । त्यस क्रममा उक्त बसमा सवार बैठाको साथबाट डाईजापाम ट्याब्लेट २५५० पिस, नाईट्राभेट ४६६५ पिस र नोरफिन १२५० पिस बरामद भएको बारा प्रहरीका प्रवक्ता एवम् प्रहरी नायब उपरीक्षक (डिएसपी) दधिराम न्यौपानेले जानकारी दिए ।

लागूऔषधसहित पक्राउ परेका बैठालाई प्रहरीले आइतबार सार्वजनिक गरेको हो । बैठालाई जिल्ला प्रहरी कार्यालय बाराको हिरासतमा राखेर कारबाही प्रक्रिया अगाडि बढाइएको डिएसपी न्यौपानेले जानकारी दिए ।