वीरगञ्ज । पर्साको धोबिनी गाउँपालिकाका एक जना जनप्रतिनिधिले प्रमुख प्रशासकीय अधिकृतमाथि आक्रमण गरी घाइते बनाएका छन् ।

गाउँपालिकाका कार्यपालिका सदस्य दिनेश प्रसाद कलवारले प्रमुख प्रशासकीय अधिकृत प्रमोद कुमार साहमाथि कुटपिट गर्दै आक्रमण गरेका हुन् । आक्रमणबाट प्रमुख प्रशासकीय अधिकृत साह घाइते भएका छन् । उनको हाल उपचार चलिरहेको छ ।

कार्यपालिका सदस्य कलवारले साहमाथि मङ्गलवार दिउँसो गाउँपालिका अध्यक्ष मदन प्रसाद चौहानको कार्यकक्षमा उनको अगाडि कुटपिट गर्दै आक्रमण गरेको प्रत्यक्षदर्शीहरूले जनाएका छन् । कलवारले साहमाथि कुटपिट गर्नुका साथै गाउँपालिका अध्यक्षको नेम प्लेट चलाएर समेत हिर्काएको कर्मचारीहरूको आरोप छ ।

नेम प्लेटबाट साहको छातीमा गम्भीर चोट लागेको छ । उनीमाथि आक्रमण गर्ने कलवारलाई प्रहरीले नियन्त्रणमा लिएको छ । उनलाई हाल जिल्ला प्रहरी कार्यालय पर्सामा राखिएको छ ।

कर्मचारीहरूका अनुसार कार्यालय समय मै मङ्गलवार दिउँसो २ बजे गाउँपालिका अध्यक्ष चौहानले प्रमुख प्रशासकीय अधिकृत साहलाई आफ्नो कार्यकक्षमा बोलाएका थिए ।

अध्यक्ष चौहानकै कार्यकक्षमा बसेका कार्यपालिका सदस्य कलवारले एक्कासि गाली गलौच गर्दै प्रमुख प्रशासकीय अधिकृत साहले लगाएको सर्टको कलर समातेर च्यात्नुका साथै लछारपछार गर्दै अन्धाधुन्ध हात मुक्काले हिर्काएका थिए । त्यसपश्चात् उनले अध्यक्षको टेबलमा राखेको उनको नेम प्लेट उठाएर साहमाथि हिर्काएको त्यहाँ उपस्थित कर्मचारीहरूको कथन छ ।

अधिकृत साह गाउँपालिकामा हाजिर भएदेखि नै कार्यपालिका सदस्य कलवारले सानातिना कुरामा विवाद खडा गरेर पटक–पटक कार्यालयबाट गर्न नहुने गैर कानुनी भुक्तानी गर्न दबाब दिँदै आएको कर्मचारीहरूको आरोप छ । कलवारले यसअघि पनि कर्मचारीहरूमाथि दुर्व्यवहार गर्नुका साथै कुटपिटको प्रयास गरेको उनीहरू बताउँछन् ।

यसै बिच अधिकृत साहमाथि जनप्रतिनिधिबाट नै भएको दुर्व्यवहार तथा कुटपिट घटनाको गाउँपालिकाका कर्मचारीहरूले भर्त्सना गरेका छन् । मङ्गलवार दिउँसो नै एउटा प्रेस विज्ञप्ति जाई गर्दै कर्मचारीमाथि आक्रमण गर्नेलाई नियन्त्रणमा लिएर कडाभन्दा कडा कारबाही गर्न उनीहरूले माग गरेका छन् ।

दोषीमाथि कारबाही नभएसम्म गाउँपालिकाअन्तर्गतको आकस्मिक सेवा बाहेक अन्य सम्पूर्ण सेवा ठप्प रहने विज्ञप्ति मार्फत उनीहरूले जानकारी समेत गराएका छन् । पीडित साहले मङ्गलवार नै दोषीमाथि कारबाहीको माग गर्दै जिल्ला प्रहरी कार्यालय पर्सामा उजुरी समेत दिएका छन् ।

कर्मचारीहरूको एक समूहले पर्साका प्रमुख जिल्ला अधिकारी दिनेश प्रसाद भुसालसँग भेटेर घटनाको विषयमा जानकारी समेत गराएका छन् । दोषीमाथि कारबाही नभए जिल्लाका सम्पूर्ण कार्यालयको कामकाज बन्द गर्ने समेत उनीहरूले चेतावनी दिएका छन् ।