वीरगञ्ज । पर्साको सखुवा प्रसौनी गाउँपालिका – ६ लखनपुरस्थित हुलाकी सडकमा मङ्गलवार बेलुकी दुई वटा मोटरसाइकल आपसमा ठोक्किएर भएको दुर्घटनामा एक जनाको मृत्यु भएको छ । अर्का एक जना गम्भीर घाइते भएका छन् ।

दुर्घटनामा दुवै मोटरसाइकलका चालक गम्भीर घाइते भएकोमा एक जनाको अस्पताल पुर्‍याउने क्रममा बाटोमै मृत्यु भएको हो ।

गण्डक नहर भन्दा उत्तर पट्टि सखुवा प्रसौनी – ६ अन्तर्गतको लखनपुर र जगरनाथपुर गाउँपालिकाअन्तर्गतको प्रसौनी गाउँको बिचमा रहेको हुलाकी सडकमा बेलुकी ८ बजेतिर दुई विपरीत दिशाबाट आउँदै जाँदै गरेका ना ७ प २६०३ र प्रदेश २ – ०३ ००९ प ५३१५ नम्बरको मोटरसाइकल आपसमा ठोक्किएर भएको दुर्घटनामा परि दुवै मोटरसाइकलका चालक गम्भीर घाइते भएका थिए

स्थानीय बासी र प्रहरीले दुवै घाइतेलाई उद्धार गरी एम्बुलेन्समा राखेर उपचारका लागि वीरगञ्ज पठाएकोमध्ये ना ७ प ५३१५ नम्बरको मोटरसाइकल चालक पर्साकै जगरनाथपुर गाउँपालिका – ४ सुहपुर निवासी अन्दाजी ३० वर्षीय हरिन्द्र चौधरीको मृत्यु भएको जिल्ला प्रहरी कार्यालय पर्साका प्रवक्ता एवम् प्रहरी नायब उपरीक्षक (डिएसपी) कुमार विक्रम थापाले जानकारी दिए ।

अर्का गम्भीर घाइते पर्साकै वीरगञ्ज महानगरपालिका – ३ छपकैयाका ४२ वर्षीय शेख जावेद आलमको भने नारायणी अस्पतालको आइसियुमा उपचार भइरहेको र उनको अवस्था पनि सिकिस्त रहेको डिएसपी थापाले बताए । घटनाको बारेमा प्रहरीले अनुसन्धान गरिरहेको थापाले जानकारी दिए ।