बारा | बाराको तामागढी साझेदारी वन क्षेत्रभित्र गोली हानेर मारिएको अवस्थामा मंगलबार तीन वर्षको पोथी बाघ पुच्छर, दाँत र जुँगा समेत चोरी भएको अवस्थामा फेला परेको छ । योसँगै बारामा डेढ महिनाको अन्तरमा बारामा करिब आठ वटा बाघ मरी सकेको छ ।

तामागढी साझेदारी वन क्षेत्रभित्र गोली लागि मृत अवस्थामा फेला परेको बाघको पुच्छर, दाँत र जुँगा समेत चोरी भएको कोल्हवी सवडिभिजन वन कार्यालयले जनाएको छ ।

चार दिनअघि बाराको कछडिया सामुदायिक वनमा करिव आठ वर्षको जवान भाले बाघ बकैया खोला छेउ मृत अबस्थामा फेला परेको थियो । मासुमा बिष हालेको कारण बाघको मृत्यु भएको आंशका थियो ।

त्यस्तै, फागुन दोस्रो साता पर्साको सखुवा प्रसौनी गाँउपालिका-२ मा चार दिनको अन्तरमा दुईवटा जवान भाले र पोथी बाघ मृत भेटिएका थिए । पर्साको ठोरीबाट नियन्त्रणमा लिएर पर्सा राष्ट्रिय निकुञ्जको खोरमा राखिएको तीनवटा बाघमध्ये दुईवटा बाघको पनि मृत्यु भएको छ ।

मंगलबार मृत फेला परेको करिव तीन वर्षको पोथी बाघ वन क्षेत्रभित्र मृत अवस्थामा भेटिएको हो । बाघलाई नाकको माथिल्लो भागमा गोली हानेर मारिएको अवस्थामा भेटिएको कोहल्वी सव डिभिजन वन कार्यलयका प्रमुख अब्दुल मियाँ अन्सारीले जानकारी दिनुभयो ।

‘गाँउघरमा बाख्रा हराएको भन्दै गाँउलेहरु जंगलमा बाख्रा खोज्न जाँदा उनिहरुले बाघ मरेको देखेर हामीलाई खबर गरेका थिए ।’ बाघ गोली लागेको मरेको अवस्थामा हामीले फेला पारेको सव डिभिजन प्रमुख अन्सारीले बताउनुभयो ।

गोली लागेर मरेको अवस्थामा बाघ भेटिएकोले सो सम्बन्धी अनुसन्धान भईरहेको कार्यालयले जनाएको छ । बाघको अवस्था हेर्दा दुई दिनअघि मारिएको हुनसक्ने अनुमान गरिएको छ । बाघको पोष्टमार्टम गरेर परीक्षणको लागि विधि विज्ञान प्रयोगशाला काठमाडौ पठाउने तयारी भएको कार्यालयले जनाएको छ ।

सन् २०२२ को डिसेम्बरमा भएको राष्ट्रिय बाघ गणनामा पर्सा राष्ट्रिय निकुञ्जमा ४१ वटा दुर्लभ पाटे बाघ रहेको तथ्यांक सार्वजनिक भएको थियो । बारा-पर्सामा पछिल्लो केहीदिन यता डरलाग्दो संख्यामा बाघको मृत्यु भएको छ ।

निकुञ्जको मध्यवर्ती क्षेत्र, राष्ट्रिय वन, साझेदारी र सामुदायिक वनको ठुलो भूभागहरुमा गर्मी समय शुरु भएसँगै जंगलमा पानीको अभाव र बन अतिक्रमण भएर वस्ती र कृषि भूमिमा परिणत भएपछि बाघलाई खाना र बस्नको अभाव देखिंदै आएको छ ।

पर्सा राष्ट्रिय निकुञ्जमा वन्यजन्तुको लागि पिउने पानीको अभाव हुँदा बाघ जङ्गल बाहिर निस्कने गरेको निकुञ्जले जनाएको छ । यसैगरी मंगलबारनै पर्सा राष्ट्रिय निकुञ्जबाट निस्केको पाटे बाघको आक्रमणबाट मंगलबार निजगढ नगरपालिका एक जना घाइते हुनुको साथै तीनवटा बाख्रा मारेको छ ।

बाघको आक्रमणबाट मंगलबार दिउँसो निजगढ नगरपालिका ११ रतनपुरकी ४० वर्षीय दिल कुमारी पुलामी मगर पनि घाइते भएकी छन् । निजगढ नगरपालिका ११ स्थित तपोभुमी सामुदायिक वनमा चौपाया चराउन गएकी मगरलाई बाघले पछाडिबाट आक्रमण गरेको घाइते दिलकुमारीले बताईन ।

बाघले आक्रमणपछि जंगलमा लडेकी दिलकुमारीलाई सँगै चौपाया चराउन गएका भोग बहादुर मोक्तान र अर्का साथीले बचाउन सफल भए तर तीनवटा बाख्रा भने बाघले मारेको छ ।