वीरगंज । लागु औषध सेवन गर्ने २६ जनालाई धनुषा प्रहरीले एकैदिन नियन्त्रणमा लिएको छ । धनुषा प्रहरीले लागु औषध विरुद्ध थालेको विशेष अभियान अन्तर्गत तेश्रो पटक बुधबार २६ जनालाई नियन्त्रणमा लिइएको हो ।
ईलाका प्रहरी कार्यालय लग्मा जटही र जिल्ला प्रहरी कार्यालय धनुषाबाट खटिएको चेकिंग टोलीले भारतको पिपरोनबाट जटही नाका हुँदै लागु औषध सेवन गरी नेपालतर्फ आउँदै गरेको २६ जनालाई नियन्त्रणमा लिएको जिल्ला प्रहरी कार्यालय धनुषाका प्रवक्ता एवम् डीएसपी रञ्जन अवांले जानकारी दिएको छ ।
उनीहरुलाई नियन्त्रणमा लिई आवश्यक अनुसन्धान र कारवाहीको लागि जिल्ला प्रहरीमा ल्याइएकोमा थप अनुसन्धान पश्चात २५ जनालाई छोडिएको र सो मध्ये एकजना माथि लागु औषध शिर्षक मुद्दा चलाइएको डीएसपी अवाँले बताए । लागु औषध सेवनकर्ता २५ जनालाई सम्झाई बुझाई अभिभावकको जिम्मा लगाइएको र धेरै मात्रामा लागु औषध बरामद भएको एकजना उपर मुद्दा चलाइएको उनले बताए ।

करिब दुई महिना अघिदेखि थालिएको अभियान अन्तर्गत पहिलो पटक ४५ जना, दोश्रो पटक ३४ जना र आज तेश्रो पटक २६ जनालाई प्रहरीले नियन्त्रणमा लिएको थियो । जसमध्ये पहिलो पटक ४ जना, दोश्रो पटक २ जना र तेश्रो पटक १ जना लागु औषधसहित बरामद भएका व्यक्ति उपर मुद्दा चलाइएको डीएसपी अवाँले जनाए ।
भारत बिहारको खुला सीमासँग जोडिएको धनुषामा पछिल्ला समयमा लागु औषधकै कारण विभिन्न अपराधिक घटनाहरु बडेपछि धनुषा प्रहरीले यो अभियान थालेको जिल्ला प्रहरी कार्यालय धनुषाका प्रहरी उपरिक्षक एवम् प्रमुख मित्रबन्धु शर्माले बताए । उता जाने लागु औषध सेवन गर्ने र नेपालमा आएर अपराध गर्ने गतिविधि बढेपछि यसलाई निरुत्साहित गर्न धनुषा प्रहरी सकृय भएको उनले बताए।

करिब दुई महिनादेखि धनुषा प्रहरीद्धारा थालिएको यो अभियान निरन्तर चलिरहने उनको भनाइ छ । ‘बोर्डरमा स्वीप अभियान अन्तर्गत लागु औषध सेवनकर्ता र ओसारपोसामा संलग्नहरु धमाधम समातिदैछ, उनले भने, नियन्त्रणमा लिएकाहरुलाई एकरात हिरासतमा राख्ने त्यसपछि अर्कोदिन बिहान काउन्सेलिंग गर्ने, कक्षा लिने, उनीहरुको रेकर्ड हेर्ने र अभिभावकलाई अनिवार्य रुपमा बोलाएर उनीहरुको अगाडी पनि लागु औषधको नकारात्मक असरबारे बताउँदै सकारात्मक सन्देश लिएर छोड्ने गरेको छु ।’
‘‘युवा बिग्रे देश बिग्रिन्छ, युवाहरु कुलतमा लाग्यो भने समाज र देश कहिलै माथि उठ्दैन’’ त्यसैले युवालाई कुलतबाट बचाउन हामीले यस्तो प्रयास थालेको प्रहरी उपरिक्षक शर्माको भनाई छ ।