पोखरिया | पोखरिया नगरपालिकामा चालु शैक्षिक सत्र २०८० मा यहि फाल्गुन ११ गते देखि फल्गुन १३ सम्म१८ वर्ष भन्दा मुनिका कक्षा १२ सम्म नियमित अध्ययनरत छात्रा छात्रहरु बीच आ आफ्नो समूहमा स्थानीय तह स्तरीय राष्ट्रपति रनिङ शिल्ड प्रतियोगिता हुने भएको छ । उक्त प्रतियोगिता पोखरिया नगरपालिकाको श्री जिल्ला उच्चाङ्गल रामदेव कलवार माध्यमिक विद्यालयको प्राङ्गनमा आयोजना हुने पोखरिया नगरपालिकाका प्रमुख प्रशासकीय अधिकृत अजय कुमार श्रीवास्तवले जानकारी गराएका छन।

उनका अनुसार राष्ट्रपति रनिङ शिल्ड प्रतियोगिता पोखरिया नगरपालिकाको सञ्चालन निर्देशिका २०७० (पाचौ संशोधन सहित) को अनुसूची-१ अनुसार फाराम भरी आवश्यक कागजातहरु सहित रीतपूर्वक प्रतियोगिता आयोजक समक्ष मिति २०८० फाल्गुन ४ गते दिनको ४:०० बजेभित्र सहभागी खेलाडीहरुको विवरण पेश गर्नुहुन सम्बन्धित विद्यालयहरुलाई सूचना द्वारा अनुरोध गरिएको बताए ।

नगरपालिकाले आयोजना गर्न लागेको खेलहरुमा भलिबलतर्फ छात्र तथा छात्रा दुवै तर्फ ,कबड्डी खेलछात्र तथा छात्रा दुवै तर्फ ,एथ्लेटिक्स दौड (ट्रयाक) तर्फ छात्र १०० मि. २००मि., ४००मि. ८००मि. १५०० मि. ४x१०० मि. रिले, छात्र १०० मि. २००मि. ४००मि. ८००मि., १५०० मि. ४×१००मि.. रिले हुने छ । त्यस्तै उफ्रने र फ्रयाक्ने (फिल्ड) तर्फ छात्र हाइजम्प, लङजम्प, त्रिपलजम्प, ज्याभलिङ्ग थ्रो ८०० ग्राम, सटपुट १२ पाउण्ड ,छात्रा हाइजम्प, लङजम्प, त्रिपलजम्प, ज्याभलिङ्ग थ्रो ६०० ग्राम, सटपुट ८ पाउण्ड को खेल आयोजना गरिने छ।

त्यस्तै प्रतियोगितामा सहभागि हुने विद्यार्थीहरुले एक खेल विधामा मात्र सहभागि हुन पाउने छन। अन्तराष्ट्रिय स्तरको प्रतियोगितामा पदक विजेता खेलाडीलाई यस प्रतियोगितामा सहभागि गराइने छैन । उक्त प्रतियोगितामा सहभागी हुनका लागि खेलाडीहरुको जन्म दर्ताको सक्कलै प्रमाण पत्र अनिवार्य रुपमा पेश गर्नुपर्नेछ सुचनामा भनिएको छ।