वीरगंज | नेपाल-भारत सीमाको भारतीय बजार बथनाहामा अस्पताल सञ्चालन गर्दै आएका विराटनगरका रविनकुमार रायको व्यापारिक साझेदारहरूले नै हत्या गरेको आरोप परिवारले लगाएको छ। विराटनगर महानगरपालिका वडा नम्बर १० तीनटोलिया शान्तिचोक घर भएका रायको शनिबार बथानाहा वीरपुर चोकमा हत्या भएको भन्दै परिवारले भारतीय प्रहरीलाई उजुरी दिएका छन्।राय भारतको अररिया जिल्लास्थित बथनाहा वीरपुर चोकमा ‘विराट दिव्य दृष्टि जनरल हस्पिटल’ सञ्चालन गर्थे। पत्नी रानीकुमारी रायको नाममा दर्ता रहेको अस्पतालका अन्य केही साझेदारहरूले उनको हत्या गरेको आरोप पत्नी रानीले लगाएकी छन्।
रविनकी पत्नी रानीका अनुसार अस्पतालमा विराटनगरकै इमरान शेख भन्ने व्यक्ति पनि साझेदार छन्। इमरानको १८ लाख रुपैयाँ फिर्ता गरेर अस्पताल एकल साझेदारीमा सञ्चालन गर्ने क्रममा विवाद सुरू भएको उनले बताइन्। फिर्ता गर्ने रकम आफूसँग नभएपछि रविनले विराटनगरकै खगेन्द्र थापासँग महँगो दरमा मिटरब्याजमा पैसा लिएको र घटना भएको दिन शनिबार खेम थापासहित १० जना एउटा स्कार्पियोमा बथनाहास्थित अस्पतालमा आएको रानीको भनाइ छ। ‘उनीहरू हस्पिटलमा आएपछि मेरो श्रीमानलाई छलफलमा लैजाने भन्दै हस्पिटलको चौथो तलामा लिएर गएका थिए,’ रानीले भनिन्, ‘हामीलाई भने तेस्रो तलामा ढोका लगाएर थुनिदिए। तत्कालै प्रहरीलाई खबर गर्यौं, प्रहरी पनि आयो। तर आएको केहीबेरपछि नै चौथो तलाबाट मेरो श्रीमानाई तल झारिदिए।’
चौथो तलाबाट धकेलेर रविनको हत्या भएको रानीको दाबी छ। उनकाअनुसार यो घटना शनिबार साँझ ५ बजेतिरको हो। उनले आफ्नो श्रीमानलाई कुटपिट गरेर छतबाट खसाएर हत्या गरेको दावी गरेकी छन्।‘मेरो श्रीमानलाई तिनै मान्छेले मारे जसले माथिल्लो तलामा लिएर गएका थिए,’ उनले भनिन्, ‘हामीले आइतबार नै घटना भएको स्थान भारतको अररिया जिल्लाअन्तर्गतको बथनाहा प्रहरी पोस्टमा किटानी जाहेरी दिएका छौं।’ परिवारको तर्फबाट भारतमा प्राथमिक रिपोर्ट गर्ने लगायतको काम सकिएको मृतकका छिमेकी सन्तोषकुमार रायले बताए।
मृतक रविनकुमारले फर्मासिस्ट र जनस्वास्थ्यमा स्नातक गरेका थिए। केही समय उनले विराटनगरकै अस्पताल चोकमा आस्था फार्मेसी पनि सञ्चालन गरेका थिए। उक्त फार्मेसीलाई उनले डा. उत्तर मैनालीको सम्पर्क केन्द्र बनाएका थिए। डा. मैनाली थप अध्ययनका लागि बाहिर गएपछि भने उनको क्लिनिक चल्न कम हुँदै गएको उनका नातेदारसमेत रहेका छिमेकी रायले बताए। भारतमा घटना भएकाले नेपाल प्रहरीले उजुरी लिन नमानेको परिवारले जनाएको छ। मोरङ प्रहरी प्रवक्ता डिएसपी रञ्जन दाहालले मृतक परिवारलाई भारतीय प्रहरीमा उजुरी दिन भनिएको बताए।‘परिवारजन उजुरी दिन आउनुभएको थियो। हामीले लिन नमिल्ने भनेका हौं। मृत्यु भारतीय भूमिमा भएका कारण त्यहीँ उजुरी दिन भनेका हौं। यहाँ हामीले उजुरी नलिएकै हो,’ उनले भने, ‘तर भारतीय प्रहरीले अनुसन्धानका लागि हाम्रो सहयोग माग्यो भने हामीले सहयोग यताबाट गर्छौं भनेका छौं।’
