वीरगञ्ज । वीरगञ्जका सुनचाँदी पसलमा अनुगमन गरिएको छ । वीरगञ्ज महानगरपालिकाको बजार अनुगमन तथा व्यवस्थापन समितिले विभिन्न सुनचाँदी पसलमा अनुगमन गरेको हो ।
महानगरका उपप्रमुख ईम्तियाज आलमको संयोजकतत्वमा गठित अनुगमन समितिले ढक तराजुको मापदण्ड जाँच गर्नुका साथै पसलका आवश्यक कागजपत्र पनि सोधखोज गरेको छ ।
शंकर साह उपेन्द्र कुमार सर्राफ ज्वेलर्स, निरज ज्वैलर्स, प्रिन्स एण्ड खुशी ज्वेलर्स, कोमल कुसुम आभुषण कला केन्द्र, दशैं साह ज्वेलर्स लगायतमा महानगरले अनुगमन गरेको हो ।
अनुगमनका क्रममा केही पसलेले महानगरपालिकामा व्यवसाय दर्ता नै नगरेको पनि फेला परेको छ । शंकर साह उपेन्द्र सर्राफ ज्वैलर्सको ढक तराजू भने मापदण्डबमोजिम नै रहेको पाइएको छ । महानगरका खाद्य अनुसन्धान अधिकृत बिपिन कुमार लाल दास, नापतौल तथा गुणस्तर कार्यालय वीरगञ्जका आनन्द कुमार गुप्ता, मनिष कुमार गुप्ता, जिल्ला प्रशासन कार्यालय पर्साका ब्रम्हदेव प्रसाद यादव, उपभोक्ता हित संरक्षण मञ्चका अजित भुजेल, सशस्त्र प्रहरी सहायक निरीक्षक वीर बहादुर लामा, वडा प्रहरी कार्यालय विर्ताका प्रहरी सहायक निरीक्षक विनोदमान सिंह लगायतको टोलीले अनुगमन गरेको हो ।
सुनचाँदी पसलेले ढक तराजुमा गडबड गरेर ग्राहकलाई ठग्दै आएको गुनासो आएपछि महानगरको अनुगमन समितिले सुनचाँदी पसलहरुको निगरानी बढाएको हो । अनुगमनलाई निरन्तरता दिने र अन्य पसलमा पनि अनुगमन गरिने समितिका संयोजक महानगरका उपप्रमुख आलमले जानकारी दिए ।
