वीरगंज । धनुषाको जनकपुरबाट चोरी भएको बस मंगलबार साँझ सिराहाको गोलबजारमा बेवारिसे अवस्थामा भेटिएको छ । इलाका प्रहरी कार्यालय गोलबजारका प्रमुख प्रहरी निरीक्षक सुनील कार्कीका अनुसार सोमबार साँझ करिब पौने ७ बजेतिर गोलबजार नगरपालिका– ८ चोहर्वास्थित शिव मन्दिरनजिकै जनकपुरबाट चोरी भएको नवदुर्गा ट्राभल्सको ना. ४ ख २३२७ नम्बरको बस फेला परेको हो ।

बस भेटिएलगत्तै जिल्ला प्रहरी कार्यालय धनुषासँग समन्वय गरी मंगलबार राति नै सवारीधनीलाई बस हस्तान्तरण गरिएको उनले बताए । जनकपुरदेखि महोत्तरीको भिठामोडसम्म चल्ने उक्त बस जनकपुरधाम उपमहानगरपालिका– ३० जिरोमाइलस्थित बसपार्कमा पार्किङ गरेर राखिएको अवस्थामा सोमबार अपराह्न चोरिएको प्रहरीले जनाएको छ ।

ad
महोत्तरीको पिपरा गाउँपालिका– ३ बस्ने कालिन्द्र मिश्राको नाममा रहेको बस पार्किङबाट हराएको भन्दै प्रहरीमा उजुरी परेपछि प्रहरीले खोजतलास गरिरहेको अवस्थामा भेटिएको हो । प्रहरीका अनुसार बस चोरीको विषयमा थप अनुसन्धान भइरहेको छ ।