वीरगन्ज | भारतकाे अयाेध्यामा नवनिर्मित राममन्दिरको प्राण प्रतिष्ठाका लागि जनकपुरबाट आइपुगेकाे ‘जनकपुरधाम-अयोध्या भार यात्रा’ शुक्रबार अयोध्या प्रस्थान गरेको छ। अयाेध्यामा नवनिर्मित राम मन्दिरमा प्राण प्रतिष्ठाका लागि जनकपुरबाट जानकी मन्दिरका महन्त रामरोशन दासको नेतृत्वमा वीरगन्जमा बिहीबार बेलुकी आइपुगेकाे टाेलीलाई वीरगन्ज महानगरपालिकाका मेयर राजेशमान सिंहले स्वागत गरेका थिए । त्यसअवसरमा मधेस प्रदेशका नेपाल प्रहरीका प्रहरी नायब महानिरीक्षक जनक भट्टराई,सशस्त्र प्रहरी नायब महानिरीक्षक दिपेन्द्र शाह,वीरगन्ज महानगरपालिकाका सदभावना दूत अशाेक वैद्य लगायतले यात्रामा सहभागीहरुलाई माला र खादाले स्वागत गरेका थिए।

शुक्रबार बिहान उक्त यात्रा वीरगन्जबाट रक्साैल हुदैं अयाेध्याका लागी प्रस्थान गरेको हो।वीरगन्जकाे आदर्शनगरस्थित राणीसती अतिथिसदनबाट निस्किएको यात्रालाई मेयर सिंहले मितेरी पुलसम्म पुगेर विदाई गरेका थिए।

शुक्रबार बिहान वीरगन्जबाट प्रस्थान गरेकाे यात्रा भारतकाे गोरखपुर हुँदै शुक्रबार नै रातिसम्म अयोध्या पुग्ने बताइएको छ।
अयाेध्यामा नवनिर्मित राममन्दिरमा जनवरी २२ तारिखमा हुने प्राणप्रतिष्ठा र उद्घाटनका लागि नेपालकाे जनकपुरबाट वीरगन्ज हुदैं प्रस्थान गरेकाे भार (काेसेली) सहितकाे यात्रामा चाँदीकाे धनुष , तीर,चरण पादुका, मिठाईका विभिन्न परिकार, आभुषण, लुगाकपडा लगायतका सामग्री समावेश छन्।