वीरगञ्ज । वीरगञ्जमा आयोजना भएको एक दिने कविता वाचन कार्यक्रम सम्पन्न भएको छ । भोजपुरिया उडान संस्थाले आयोजना गरेको एक दिने कवि गोष्ठीमा उपस्थित कवि वक्ताहरूले कविता, गीत, गजल, मुक्तक लगायत वाचन गरेर सभाको शोभा बढाउनु भएको संस्थाका सचिव कृष्ण पासवानले जानकारी गराए । वीरगञ्जको कलवार कल्याण समितिमा आयोजना भएको सो कार्यक्रमका प्रमुख अतिथि वरिष्ठ साहित्यकार प्रमोद पाण्डे सहित विशिष्ट अतिथिहरूले दीप प्रज्वलन गरेर कार्यक्रम उद्घाटन गरेका थिए ।

विभिन्न ठाउँबाट जमघट भएका कविहरूको कविता गीत गजलले त माहौल बनाएकै थियो तर आयोजक संस्थाको लगनशीलता र मिहिनेतका कारण गरिएको प्रयास सराहनीय रहेको भाषाकर्मी अशोक कुश्वाहाले बताए । कुश्वाहाले भने, ‘आफ्नै मातृभाषाको आनन्द लिइरहँदा आफ्नै माटोको सुगन्ध छर्कन चियासँग मकैको लावा र खाजामा मालपुवा र चटनीको स्वादले माहौल नै भोजपुरीमै बनाएको आभास भयो ।’ भोजपुरी भाषाको उत्थान, प्रवर्द्धन तथा संरक्षणका लागि प्रयासरत रहेको हाम्रो संस्था भोजपुरिया उडानले बेलाबखत यस्ता कार्यक्रम आयोजना गरेर सम्पूर्ण कवि वर्गलाई एकीकृत गर्दै आफ्नो भाषालाई अगाडि बढाउन सबैसँग हातेमालो गर्ने अध्यक्ष आमोद प्रसाद गुप्ताले जिकिर गरे ।

कार्यक्रममा विशिष्ट अतिथि बाराका रामप्रसाद साह, सिम्रौनगढका बतहु यादव, प्राज्ञ दिनेश गुप्ता, नेपाल भोजपुरी समाजका ध्रुव सिंह ठकुरी, अतिथि अनिता साह, अजमत अलि, ऋतु राज, अशोक कुश्वाहा, विनय गुप्ता, राधेश्याम गुप्ता, संस्थाका ललन शहनी, कृष्ण पासवान, छोटु राजा, जय यादव लगायतको उपस्थिति रहेको थियो ।