वीरगञ्ज । वीरगञ्जमा २ जनाले खुलेयाम रुपमा नक्कली नोटबाट सामान खरिद गरीरहेको पाइएको छ । सोमवार वीरगञ्जको घण्टाघरस्थित आदर्श वाच सेन्टरबाट २ जना पुरुषले घडी खरिद गरेर नक्कली नोट दिएपछि नक्कली नोटले सामान खरिद गरीरहेको रहस्य बाहिरिएको हो ।
दुई जना पुरुष मोटरसाइकलबाट उत्रिएर हेल्मेट हातमा बोकेर आदर्श वाच सेन्टरमा पुग्छन् । उनीहरुले घडी खरिद गर्नका लागि हेर्छन् । उनीहरुले १८ सय रुपैयाँमा राडो घडी खरिद गर्छन् ।
एक जनाको छोटो कपाल, भित्र निलो टिर्सट र बाहिर कालो रंगको विनसिटर लगाएका र अर्का एकजनाको सेतो सर्ट र सेतै रैगको विनसिटरसँगै गलामा पहेँलो रंगको गम्छा ओढेका व्यक्तिहरुले नक्कली नोटबाट सामान खरिद गर्ने योजना बनाएको पाइएको छ ।
कालो रंगको कपडा लगाएकाले हातमा घडी बाँधेर हेरीरहेको र सेतो कपडा लगाएका व्यक्तिले पर्सबाट नेपाली १ हजारको २ वटा नक्कली नोट निकालेर पसलवालालाई दिँदै गरेको पसलको सिसिटिभी फुटेजमा स्पष्ट देखिन्छ ।
भारतीय नक्कली नोटमा शंकास्पद हुने भएपनि नेपाली नोट देखेपछि कुनै आशंका नगरी राखिएको पसलका सञ्चालक शशीकान्त सर्राफले जानकारी दिए । उनकाअनुसार पछि अर्काे ग्राहकलाई पैँसा फिर्ता गर्ने क्रममा नक्कली नोट भएको थाहा पाएपछि प्रहरीलाई खबर गरिएको छ । प्रहरीले मुचुल्का उठाएर लिएको छ भने उनीहरुको खोजी कार्य गरीरहेको छ ।
