नेपाली सेनाको निमन्त्रणामा आगामी फागुन पहिलो साता २२ देशका सैनिक संयुक्त राष्ट्रसंघीय शान्ति स्थापनामा पेसागत दक्षता र समन्वयात्मक क्षमता अभिवृद्धिसम्बन्धी अभ्यासका लागि आउने भएका छन् । नेपालमा यसअघि तीनपटक आयोजना भइसकेको बहुराष्ट्रिय अभ्यास ‘शान्ति प्रयास’को चौथो संस्करणका लागि २२ देशका सैनिक आउन लागेका हुन् ।
सेनाको आयोजनामा ८ देखि २१ फागुनसम्म अभ्यास सञ्चालन हुनेछ । यो अभ्यास अमेरिकी सरकारको ग्लोबल पिस अपरेसन इनिसिएटिभ (जिपिओआई)को सहयोगमा सञ्चालन हुने सैनिक प्रवक्ता सहायकरथी कृष्णप्रसाद भण्डारीले जानकारी दिए । अभ्यासको पूर्वतयारीस्वरूप २५ देखि २९ मंसिरसम्म वीरेन्द्र शान्ति कार्य तालिम केन्द्र पाँचखालमा नेपाल, अमेरिका, अस्ट्रेलियालगायतका प्रतिनिधिहरू सम्मिलित योजना सम्मेलन भएको सेनाले जनाएको छ ।
ad
नेपाल, बंगलादेश, श्रीलंका र अमेरिकाका सैनिकको सहभागितामा नेपालमा सन् २००० मा पहिलोपटक अभ्यास शान्ति सञ्चालन भएको थियो । सन् २०१३ मा २३ राष्ट्रका ८५० सैनिकको सहभागीतामा दोस्रो, सन् २०१७ मा २९ राष्ट्रका ११३५ सैनिकको सहभागितामा तेस्रो संस्करण अभ्यास भइसकेको छ ।
‘अभ्यास शान्ति प्रयासको चौथो संस्करणमा नेपालसहित २२ राष्ट्रका सैनिकहरूको सहभागिता रहने प्रारम्भिक योजना छ,’ सैनिक जनसम्पर्क तथा सूचना निर्देशनालयद्वारा सोमबार जारी विज्ञप्तिमा भनिएको छ । स्टाफ ट्रेनिङ इभेन्ट, फिल्ड ट्रेनिङ इभेन्ट र क्रिटिकल इन्याबलर एन्ड क्यापासिटी इन्ह्यान्समेन्ट गरी तीन प्रकारका गतिविधि समावेश हुने सेनाले जनाएको छ ।
