वीरगञ्ज । पछिल्लो २४ घण्टादेखि हराइरहेकी एक जना बालिकाको शव नग्न अवस्थामा फेला परेको छ ।
मधेस प्रदेशको केन्द्र धनुषा जिल्लाको सबैला नगरपालिका – २ कुसमहा सतोखर बस्ने ६ वर्षीय बालिका रेखा यादवको शव सतोखर पोखरी नजिक पानी जमेको खाल्डोमा नग्न अवस्थामा फेला परेको प्रहरीले जनाएको छ ।बालिकाले लगाएको कपडा खाल्डो भन्दा अलि पर फेला परेको प्रहरीको भनाई छ ।
इलाका प्रहरी कार्यालय सबैलाका प्रहरी निरीक्षक (इन्स्पेक्टर) सुन्दर चौलागाँई अनुसार बालिकाको शव बिहीबार बेलुका ७ बजे फेला परेको थियो ।
शवको प्रकृतिले घटना शङ्कास्पद देखिएको इन्स्पेक्टर चौलागाँईले बताए । बालिकाको बलात्कार गरी हत्या गरिएको हुनसक्ने प्रहरीको आशङ्का छ । ‘तलको भागको कपडा छैन । शरीरमा रगतजस्तो देखिएको छ । संवेदनशील अङ्गमा चोट देखिएको छ । बलात्कारकै आशङ्का छ, यसबारे विस्तृत अनुसन्धानपछि खुल्ला,’ उनले भने । बालिका बुधवार विवाह पञ्चमीको अवसरमा निकालिने मटकोरको रथ यात्रामा सहभागी भएकी थिइन् । सतोखर पोखरीसम्म बालिका रथमै चढेर आए पनि त्यहाँ उनलाई २/३ जना युवकले तल झारेका थिए । रथ यात्रामा गएकाहरूसँग बालिका नफर्किएपछि उनको खोजी सुरु भएको थियो । खोजबिनका क्रममा बालिकाको शव खेतमा खनेको खाल्डोमा फेला परेको इन्स्पेक्टर चौलागाँईले जानकारी दिए ।
शव फेला परेदेखि नै तालिमप्राप्त कुकुरसहितको प्रहरी टोली घटनास्थल पुगेर अनुसन्धान गरिरहेको चौलागाँईको भनाई छ । घटनास्थलको मुचुल्का गरी शव पोस्टमार्टमका लागि प्रादेशिक अस्पताल जनकपुर लगिने उनले बताए । पोस्टमार्टमको रिपोर्ट आएपछि घटना सम्बन्धी थप जानकारी मिल्ने उनको कथन छ ।
बालिकालाई रथबाट उतार्ने दुई जना युवालाई प्रहरीले नियन्त्रणमा समेत लिएको छ । “उनीहरूसँग सोधपुछ भइरहेको छ, अझै केही जानकारी दिन मिल्दैन,” इन्स्पेक्टर चौलागाँईले भने ।
