वीरगञ्ज । सर्लाहीको हरिपूर्वा नगरपालिकामा दिनदहाडै लुटपाट भएको छ । अज्ञात समूहले बिहीबार दिउँसो पेस्तोल देखाउँदै झन्डै पाँच लाख रुपैयाँ लुटपाट गरेको बुझिएको छ । हरिपूर्वाको हनुमान चोक नजिक रहेको बैङ्कको शाखाबाट दिउँसो अढाई बजेको समयमा पैसा निकालेर बाहिर निस्केका व्यक्तिहरूलाई पेस्तोल देखाएर अज्ञात समूहले लुटपाट गरेको हो ।
स्थानीय प्रत्यक्षदर्शीहरूका अनुसार हरिपूर्वास्थित एनआइसी एसिया बैङ्कको शाखाबाट पाँच लाख रुपियाँ झिकेर जयगङ्गा बचत तथा ऋण सहकारी संस्थाको सेवा केन्द्र बसन्तपुरतर्फ तर्फ जाँदै गरेको अवस्थामा अज्ञात समूहले पेस्तोल देखाउँदै लुटपाट गरेको थियो ।
वसन्तपुर सेवा केन्द्रका प्रमुख रामनाथ राय र कर्मचारी निरा रायले ना १५ प ९८९२ नम्बरको मोटरसाइकल पैसा लिएर हरिपूर्वाबाट वसन्तपुरतर्फ जाँदै गर्दा अज्ञात समुहले पेस्तोल देखाएर लुटपाट गरेको सहकारीले जनाएको छ । रकम लुटेर भाग्नेहरूलाई स्थानीयले लखेटे पनि उनीहरू एक राउन्ड हवाई फायर गर्दै भाग्न सफल भएको प्रत्यक्षदर्शीहरूको भनाइ छ ।
लुटेराहरूले आफ्नो अनुहार कालो रङ्गको कपडाले छोपेको कारण उनीहरूको पहिचान गर्न सकिएको छैन । उनीहरू सवार मोटरसाइकलको नम्बर प्लेटमा पनि हिलो लागेको जिल्ला प्रहरी कार्यालय सर्लाही प्रवक्ता एवम् प्रहरी नायव उपरीक्षक (डिएसपी) दीपेन्द्र पञ्जियार थारुले बताए । डिएसपी थारुले लुटपाटमा संलग्नहरूको खोजी कार्य तीव्र बनाइएको पनि जानकारी दिए । अहिले जिल्लाभरि तथा सीमा क्षेत्रमा कडाइका साथ चेकजाँच भइरहेको थारुले बताए । उनका अनुसार घटनाका सम्बन्धमा वरिपरिका स्थानीय र लुटिएका कर्मचारी सँग सोधपुछ जारी रहेको छ ।
