वीरगञ्ज । वीरगञ्जस्थित शलोम स्कूलको निर्देशकमा युवा उद्यमी निश्चल प्रजापति नियुक्त भएका छन् ।वीरगञ्जको सूर्योदय नगरस्थित २८ वर्ष लामो इतिहास बोकेको शलोम स्कूलको निर्देशकमा युवा उद्यमी प्रजापति नियुक्त भएका हुन् । विद्यालयका नवनियुक्त निर्देशक प्रजापति आफै २५ वर्षका छन् । सानै उमेरमा झन्डै ३० वर्ष पुरानो इतिहास बोकेको विद्यालयको निर्देशक बनेर प्रजापतिले नयाँ इतिहास नै रचेका छन् ।

प्रजापति विद्यालयको निर्देशकमा नियुक्त हुनु अघि समाज सेवामा सक्रिय थिए । उनी देशकै प्रतिष्ठित पहिलो पाइला संस्थाको पर्सा शाखाको संस्थापक अध्यक्ष रहिसकेका छन् । त्यस्तै उनी रोटरी र रोटर्याक्ट क्लबमा समेत सक्रिय छन् । उनी विभिन्न राष्ट्रिय र अन्तर्राष्ट्रिय सङ्घ संस्थाबाट सम्मानित पनि भइसकेका छन् ।

निर्देशकका रूपमा विद्यालयको जिम्मेवारी सम्हाल्दै उनले भविष्यमा शलोम स्कूललाई सहरकै उत्कृष्ट शैक्षिक संस्थाका रूपमा विकास गर्ने आफ्नो योजना रहेको बताए । उनले आफ्नो नेतृत्वमा विद्यालयमा हुँदै आएको परम्परागत सिकाइको तरिकालाई परिवर्तन गरेर आधुनिक र प्रयोगात्मक शिक्षामा जोड दिने पनि बताए । सूर्योदय नगरसँगै विद्यालयको जुनियर शाखा वीरगञ्जको गहवा टोलमा पनि छ ।