जनकपुर । लघुवितीय संस्थाविरुद्ध गठित संघर्ष समिति नेपालले विभिन्न ९ बुँदे माग राख्दै पर्सा सिडिओलाई ज्ञापन पत्र बुझाएको छ ।
लघुवितीय संस्थाविरुद्ध संघर्ष समिति नेपालले जुलुस निकाल्दै पर्साका प्रमुख जिल्ला अधिकारी हिरालाल रेग्मीलाई ज्ञापन पत्र बुझाएको हो । ज्ञापन पत्र बुझाउदै संघर्ष समिति नेपालले तत्कालै लघुवितीय संस्थाको खारेजीको माग गरेको छ । यसैगरी ज्ञापनपत्रमा भनिएको छ,‘लघुवितीय संस्थाहरुले लगाएको सामूहिक ऋण मिनाहा गर, किशानहरुलाई निःशुल्क ऋण प्रदान गर, सामाजीक अर्थतन्त्रको विकास गर ।’

योसहित ९ विभिन्न वटा बुँदा लागु गर्न लघुवितीय संस्थाविरुद्ध संघर्ष समिति नेपालले प्रजिअलाई आग्रह गरेको छ । ज्ञापनपत्र बुझ्दै पर्सा प्रमुख जिल्ला अधिकारी रेग्मीले तत्कालै मागको सम्बोधन गर्ने प्रतिवद्धता जनाए ।
उनले भने,‘तपाइहरुको मागलाई कार्यान्वय गराउन मन्त्रालयमा सबै विषय जानकारी गराउँछु, अनि दुःख दिने लघुवितीय संस्थाहरुलाई पनि प्रहरीको माध्यमबाट कारबाही गराउनेछु ।’

लघुवितीय संस्थाहरु सरकारले तोकेको भन्दा बढी व्याज लिएको जनाउ गर्दै बीरगञ्जमा विरोध प्रदर्शन गरिएको हो । विभिन्न गाउँबाट आएका महिलाहरु नगर परिक्रमा गर्दै महिलाहरुले सिडिओलाई ज्ञापनपत्र बुझाएका थिए ।