वीरगञ्ज । वीरगञ्ज महानगरभित्र रहेका अधिकांश मदिरा व्यवसाय दर्ता बिना नै सञ्चालनमा रहेको पाइएको छ । वीरगञ्ज महानगरपालिकाका उपप्रमुख इम्तियाज आलमको संयोजकत्वमा गठीत अनुगमन समितिले गरेको अनुगमनका क्रममा अधिकांश पसल दर्ता नभएको पाइएको हो । खाद्य अनुसन्धान अधिकृत बिपिन कुमार दासको नेतृत्वमा वीरगञ्जको घण्टाघर, माईस्थान, आदर्शनगर लगायतका स्थानमा रहेका ९ वटा मदिरा फर्मममा अनुगमन गरिएको हो ।
बिहिवार र शुक्रवार गरिएको अनुगमनको क्रममा म्याद गुज्रिएका बड्बाइजर, नेपाल आईस लगायतका बियर नष्ट गरिएको अनुगमन टोलीमा सहभागी होटल तथा पर्यटन व्यवसायी संघ वीरगञ्जका अध्यक्ष हरि पन्तले बताए । उनकाअनुसार महानगरमा व्यवसाय दर्ता नभएका होटल तथा मदिरा व्यवसायीहरुलाई महानगरमा दर्ता हुन संघले छुट्टै सर्कुलर जारी गर्ने तयारी गरेको छ ।
बिना दर्ता सन्चालनमा रहेका मदिरा व्यवसायीहरुलाइ महानगरमा दर्ता गर्न एक साताको समयसहित खाद्य अनुसन्धान अधिकृत बिपिन कुमार दासले चेतावनी दिएका छन् । दिपक इम्पेक्स, शिखर इन्टर्प्राजेज, जय जग्दम्बा, रबि ट्रेडर्स, लक्ष्मी स्टोर, साजन स्टोर, अजित इम्पेक्स, रिया एण्ड अदिती लगाएतका फर्महरुमा अनुगमन गरिएको दासले बताए ।
दर्ता नभएको, नवीकरण नभएको, मिति गुज्रिएको मदिरा बिक्रि भएको तथा एक्स्पायरी जोन नछुट्टयाएको जस्ता कैफियत अनुगमनका क्रममा भेटिएको थियो । उपभोक्ता मञ्चका अजित भुजेल, वीरगञ्ज उद्योग बाणिज्य संघका प्रतीनिधि मनोज दास, जिल्ला प्रसासन, घरेलु, बाणिज्य तथा नाप तौल कार्यालयका प्रतिनिधिहरु पनि अनुगमनमा सहभागी थिए ।
