वीरगंज । प्रदेश स्तरीय संयुक्त राजनीतिक दलित सर्घष समितिले जिल्ला र पालिका तहमा संगठन निमार्ण गरि दलित अधिकारका लागि सर्घष गर्ने निर्णय गरेका छन् ।जनकपुरमा ६ ओटा राजनीतिक दलका दलित भातृ संगठनले निमार्ण गरेको संयुक्त सर्घष समितिको बुधबारको बैठकले सो निर्णय गरेको हो । समितिका संयोजक रामो महराको अध्यक्ष्तामा बसेको बैठकले आगामी मंसिर ३० गते पर्सा जिल्लाबाट जिल्लास्तरीय संयुक्त सर्घष समिति बनाउने निर्णय गरेको हो ।

बैठकको निर्णय सुनाउँदै प्रदेश संयोजक महराले भने, ‘अहिले संघीय सरकारले शिक्षा, निर्वाचन र निजामति विद्येयकमा दलितको कोणबाट छलफल बहस चालउने र आवश्यक सुझाव दिने निर्णय गरेका छौं ।’ संयुक्त राजनीतिक दलित सर्घष समितिले मधेश प्रदेशमा दलितमाथि भइरहेको उत्पीडन, छुवाछुतका घटनाहरुलाई गम्भिरताका साथ लिएर कानुनी कार्यवाही गर्न प्रदेश प्रहरी कार्यालयलाई ध्यानाकर्षण गराउने र दलित सशक्तिकरण ऐन कार्यान्वयनका लागि मुख्यमन्त्री, खेलकुद तथा समाज कल्याण मन्त्रालय र सभामुखलाई ध्यानार्कषण गराउने निर्णय गरेको छ ।

जिल्लास्तरीय भेलामा दलित समुदायको समसामयिक विषयमा छलफल गर्नुका साथै जिल्लास्तरमा सबै राजनीतिक दल सम्मिलित संयुक्त सर्घष समिति बनाउने र चक्रिय प्रणाली अनुसार नेतृत्व परिवर्तन गर्ने संयोजक महराले बताए । समितिको बैठकमा नेपाल दलित संघका प्रदेश अध्यक्ष रामवरण पासवान, दलित मुक्ति मोर्चाका प्रदेश अध्यक्ष लवकुश बैठा, सचिव विनोद महरा, नेपाल उत्पीडित जातीय मुक्ति समाजका प्रदेश सचिव अशोक मंडल, समाजवादी दलित मुक्ति महासंघका प्रदेश अध्यक्ष रामो महरा, महासचिव शोभित पासवान लगायतको सहभागिता रहेको थियो ।