वीरगञ्ज । वीरगञ्जको आदर्शनगरस्थित राधादेवी मेमोरियल लायन्स स्कूल अबदेखि वीरगञ्ज महानगरपालिका र लायन्स क्लबले संयुक्त रूपमा सञ्चालन गर्ने भएको छ । विद्यालय सञ्चालनका लागि विगत ४२ वर्ष अघि जग्गा दान गर्ने जग्गा दाता मुरलीधर शर्मालाई आइतबार एक कार्यक्रकाबिच अभिनन्दन गर्दै उनको स्वर्गीय आमाको नामबाट स्थापना भएको स्कूल महानगर र लायन्सले संयुक्त रूपमा सञ्चालन गर्ने सहमती भएको हो ।
विगतमा बेवारिसे अवस्थामा रहेको स्कूललाई पुनर्जीवन दिएर नयाँ ढङ्गबाट गुणस्तरीय पठनपाठनको व्यवस्था मिलाउने गरी सञ्चालन गरिने महानगर प्रमुख राजेशमान सिंहले बताए ।

उनले विद्यालय सञ्चालनका लागि करोडौँ मूल्यको जग्गा उपलब्ध गराउने शर्मा परिवारप्रति आभार प्रकट गर्दै वर्तमान समयमा पनि व्यक्तिगत भन्दा सामाजिक हितका लागि दान गर्ने शर्मा समाजकै लागि उदाहरणीय व्यक्ति रहेको बताए ।जग्गा दाता परिवार र लायन्सको सोच अनुरूप विद्यालयलाई गुणस्तरीय र सबैको पहुँचमा रहने गरी पठनपाठन गराउने व्यवस्था महानगरले गर्ने भन्दै उनले त्यसका लागि आवश्यक गृहकार्य गर्न शिक्षा महाशाखालाई निर्देशन समेत दिए । कार्यक्रममा वरिष्ठ उद्योगी अशोक वैद्यले बेवारिसे अवस्थामा रहेको विद्यालयलाई पुनर्जीवन दिन महानगरले थालेको कदम सह्रानीय रहेको बताए । विद्यालय सञ्चालनका लागि मुरलीधर शर्माले २०३८ असार १५ गते ७ कट्ठा ५ धुर जग्गा विद्यालयको नाममा रजिस्टर्ड गरेरै दान दिएका थिए । मुरलीधर शर्मा र उनको धर्मपत्नी विमलादेवी शर्मालाई प्रशंसा पत्र र दोसल्ला ओढाएर सम्मान गरिएको हो ।

विद्यालय सञ्चालनका लागि दान गरेको जग्गामा गएको ४२ वर्षदेखि विद्यालय सञ्चालन बेवारिसे रूपले भइरहेको भन्दै जग्गा दाता शर्माले असन्तोष व्यक्त गर्दै आएका थिए । अब भने महानगरले नै विद्यालय सञ्चालन गर्ने जमर्को गरेकाले गुणस्तरीय र सबैको पहुँचमा रहने गरी विद्यालय चल्नेमा आफू विश्वस्त रहेको पनि शर्माले बताए । लायन्स क्लब अफ वीरगञ्जका अध्यक्ष पप्पु श्रीवास्तवको सभापतित्वमा सम्पन्न कार्यक्रममा महानगरपालिकाका निमित्त प्रमुख प्रशासकीय अधिकृत अरविन्दलाल कर्ण, वडा नम्बर ५ का वडाध्यक्ष प्रदीप चौरसिया, वडा नम्बर ६ का वडाध्यक्ष जयप्रकाश साह, लायन्स क्लब अफ वीरगञ्जका भूतपूर्व अध्यक्ष बलराम श्रेष्ठ, छेडुप लामा, विनीत जयसवाल, ग्रिन सिटी सामुदायिकका अध्यक्ष जयप्रकाश खेतान लगायतको सहभागिता रहेको थियो ।