वीरगञ्ज । सनी शाह| वीरगञ्ज पब्लिक स्कुल (बिपिएस प्लस टु कलेज) ले कक्षा ११ का विद्यार्थीहरुलाई स्वागत गरेको छ । स्कुलको कक्षा १२ मा अध्ययनरत विद्यार्थीहरुले २ दिने कार्यक्रमको आयोजना गर्दै कक्षा ११ का विद्यार्थीहरुलाई स्वागत गरेका हुन् ।
स्कुलका प्रबन्ध निर्देशक मुकेश गुप्ताको अध्यक्षतामा आयोजित स्वागत कार्यक्रमलाई सम्बोधन गर्दै पर्साका प्रमुख सशस्त्र प्रहरी उपरीक्षक किसन कर्माचार्यले लगनशिलताको निरन्तरताले नै सफलता दिलाउने बताए । अध्ययनसँगै अतिरिक्त क्रियाकलापमा पनि अब्बल बन्न सुझाव दिँदै सशस्त्र प्रहरी उपरीक्षक कर्माचार्यले आफ्नो रुचीलाई पहिचान गरेर त्यही क्षेत्रमा उत्कृष्ट बन्न आग्रह गरे ।
कार्यक्रममा कलेजका अनुशासन विभाग प्रमुख वैश शेख, अतिरिक्त क्रियाकलाप संयोजक अफरोज हवारी, परीक्षा संयोजक अखिल पटेल, चार्टड लेखापाल देवराज सर्राफ, सञ्चारकर्मी सूर्य शुभचिन्तक, लेखापाल शालु गुप्ता लगायतको उपस्थिती रहेको थियो ।
स्वागत कार्यक्रममा कलेजमै अध्ययनरत विद्यार्थीहरुको समूहले तेक्वान्दो प्रस्तुती प्रस्तुत गरेको थियो भने कक्षा ११ र १२ मा अध्ययनरत विद्यार्थीहरुले विभिन्न सांगीतिक तथा सांस्कृतिक प्रस्तुती प्रस्तुत गरेका थिए । स्कुलमा विज्ञान संकाय र व्यवस्थापन संकाय तर्फ गरी करिब ३ सय जना विद्यार्थीहरु कक्षा ११ मा भर्ना भएका छन् । चालु शैक्षिक सत्रमा कक्षा ११ मा भर्ना भएका विद्यार्थीहरुलाई प्रेरित गर्नुका साथै उनीहरुको क्षमता अभिवृद्धि एवम् व्यक्तित्व विकासका निम्ती कार्यक्रम उपयोगी हुने कलेजका प्रबन्ध निर्देशक मुकेश गुप्ताको विश्वास छ ।
