वीरगञ्ज । “मधेस युनाइटेड नेसन्स सिमुलेशन” वैचारिक युवा समाज र अमेरिकी दूतावासद्वारा आयोजित संयुक्त राष्ट्र सङ्घको एउटा नमुना सम्मेलन हो ।
सम्मेलनले मधेस प्रदेशका विभिन्न भागका विद्यार्थी र युवा वर्गलाई संयुक्त राष्ट्र सङ्घको कार्य प्रणालीसँग परिचित हुन र प्रमुख विश्वव्यापी मुद्दा र घटनाबारे छलफल गर्ने अवसर प्रदान गर्दछ । सम्मेलन अन्तर्राष्ट्रिय स्तरको शैक्षिक फोरम हो, जसको मूल उद्देश्य सहभागीमा अनुसन्धान, नेतृत्व, कूटनीतिक बहस, लेखन र विशेष गरी बौद्धिक विश्लेषण जस्ता सीप वृद्धि गर्नेमा केन्द्रित छ ।
त्यसै गरी युवाहरूको जीवनमा अर्थपूर्ण प्रभाव सिर्जना गर्ने, र बौद्धिक रूपमा सचेत विश्वव्यापी नागरिक बन्न उनीहरूलाई सहयोग गर्ने दीर्घकालीन दृष्टिकोणका साथ यो कार्यक्रम अघि बढ्दै आएको छ ।
सन् २०१४ मा, वैचारिक युवा समाजले नेपालमा पहिलो विश्वविद्यालय स्तरको अन्तर्राष्ट्रिय मोडल संयुक्त राष्ट्र सङ्घ एभरेस्ट इन्टरनेशनल मोडल युनाइटेड नेसन्स (इआइएमयुएन) बाट आफ्नो यात्रा सुरु गरेको थियो । सन् २०१६ देखि संस्थाले नेपालमा स्थित अमेरिकी दूतावाससँग सहकार्य गरी इआइएमयुएन सञ्चालन गर्दै आएको छ ।
सम्मेलन “ रोड टु इआइएमयुएन” अभियानअन्तर्गत पर्ने प्रादेशिक स्तरको सम्मेलनमध्ये एक हो । यस वर्ष “मधेस युनाइटेड नेसन्स सिमुलेशन” को तेस्रो संस्करण वीरगञ्जमा आयोजना हुँदै छ । तिन दिनसम्म चलने सम्मेलनमा सहभागिताको लागि आवेदन फारम खुला गरिएको छ । सम्मेलनमा भाग लिनको लागि तपाईँ यहाँ क्लिक गरेर फारम भर्न सक्नु हुन्छ ।
कार्यक्रमको बारेमा थप जानकारीका लागि तपाईँले युथ्स थिन्कर्स सोसाइटी र एभरेस्ट इन्टरनेशनल मोडेल युनाइटेड नेशन्सको सामाजिक सञ्जालमा गएर लिन सक्नु हुनेछ । युवाहरूको लागि एमयुएन एउटा सुनौलो अवसर रहेकोले यसलाई नछुटाउन आयोजकहरूको आग्रह छ ।
