वीरगञ्ज । रुसी सेनामा कार्यरत तीन जना नेपालीको मृत्यु भएको छ । रुसी सेनामा कार्यरत रहेको अवस्थामा तीन नेपालीको मृत्यु भएको मस्कोस्थित नेपाली दूतावासले जानकारी रुसी सेनाले दिएको जनाएको छ ।

दूतावासले परराष्ट्र मन्त्रालयलाई पठाएको पत्रअनुसार मृत्यु हुनेमा स्याङ्जाको पुतली बजार–५ का प्रितम कार्की, दोलखाको मेलुङ–६ का राजकुमार रोक्का र इलाम–५ का गङ्गाराज मोक्तान छन् । उनीहरूको गत १५ नोभेम्बर (कात्तिक २९) गते मृत्यु भएको जानकारीसहित रुसी सेनाका अधिकारीबाट मृत्यु प्रमाणपत्रसमेत प्राप्त भइसकेको दूतावासले जनाएको छ ।

रुस र युक्रेनबिचको युद्धका क्रममा केही नेपाली पनि रहेको सूचना सार्वजनिक भइरहेका बेला तीन नेपाली मारिएको घटना सार्वजनिक भएको हो ।
उनीहरूको गत कात्तिक २९ गते तिहारको भाइटिकाका दिन एकैसाथ मृत्यु भए पनि परिवारले दुई सातापछि मात्रै खबर पाएका हुन् । स्याङ्जा कार्की नेपाली सेनाबाट निवृत्त भएका हुन । दोलखाका रोक्का भने केही वर्ष अघिसम्म सशस्त्र प्रहरीमा कार्यरत रहेको र अवधि नपुग्दै राजीनामा दिएका थिए ।