बारा । नेपाल वन प्राविधिक संघले डिभिजन वन कार्यालयका प्रमुख विनोद सिंहलाई सम्मान गरेको छ ।

वन संरक्षण र व्यवस्थापनमा महत्त्वपूर्ण भूमिका निर्वाह गरेको भन्दै वन प्राविधिक संघले शनिवार सिंहलाई सम्मानित गरेको हो । सिंह करिब डेढ वर्षदेखि बारामा डिभिजन वन अधिकृतको भूमिका छन् ।

बारा, महोत्तरी र रौतहटमा अतिक्रमणमा भएको वन क्षेत्रको जग्गा संरक्षण गरेर वृक्षारोपण गर्ने, चोरी तस्करी नियन्त्रण, वातावरण र जैविक विविधता संरक्षण लगायत क्षेत्रमा सिंहले काम गर्दै आएका छन् ।

पछिल्लो समय सिंह मधेस प्रदेशको वन ऐन २०७७ को पहिलो संशोधन र प्रदेश वन नियमावली निर्माण समितिमा सदस्य समेत रहेका छन् । डिभिजन वन अधिकृत सिंहलाई काठमाडौँमा आयोजित कार्यक्रममा उपराष्ट्रपति रामसहाय प्रसाद यादवले सम्मान प्रदान गरेका हुन् ।