वीरगञ्ज । प्रहरीले आइतबार एकै दिन लागूऔषधसहित पाँच जनालाई मकवानपुरबाट पक्राउ गरेको छ । हेटौँडा उपमहानगरपालिका – १५ चुरिया माई पिपल चौताराबाट १० किलोग्राम गाँजा सहित भारत मोतिहारी थानाआधापुर पोस्ट ग्राम औरया जमुनाभर बस्ने २२ वर्षीय सदुला अन्सारी र भारतको मिर्जापुर बस्ने २४ वर्षीय रजनिस सिंहलाई प्रहरीले पक्राउ गरेको छ । चितवनबाट वीरगञ्ज तर्फ आउँदै गरेको ना.६ ख.६७५४ नम्बरको बसमा सवार अन्सारी र सिंहको झोलाबाट प्रहरीले ५/५ किलो गाँजा बरामद भएको जिल्ला प्रहरी कार्यालय मकवानपुरले जनाएको छ ।

त्यस्तै हेटौँडा उपमहानगरपालिका – १५ रातोमाटे चेक पोइन्टबाट ९ किलोग्राम लागूऔषध गाँजा सहित मनहरी गाउँपालिका – ८ निवासी ४० वर्षीय मङ्गल थोकर, सोही स्थान बस्ने १८ वर्षीय दिपक मोक्तान र ५० वर्षीय बुद्धि मोक्तानलाई प्रहरीले पक्राउ गरेको छ । प्रहरी चौकी रातोमाटेबाट खटिएको चेकिङ टोलीले नारायणघाटबाट वीरगञ्जतर्फ आउँदै गरेको ना.४ ख ५९२२ नम्बरको बसबाट तीनै जनालाई शंका लागेर चेकजाँच गर्दा उक्त गाँजा फेला परेको मकवानपुर प्रहरीले जनाएको छ । दुवै घटनाको सम्बन्धमा थप अनुसन्धान भइरहेको प्रहरीले जनाएको छ ।