वीरगञ्ज । आन्तरिक पर्यटन प्रवर्द्धन गर्ने उद्देश्यमा लागेका चितवनको भरतपुरका ‘बुलेट राइडर’ हरूले दोस्रो पटक पर्साको मुख्य पर्यटकीय स्थल ठोरीको भ्रमण गरेका छन् । “राइड वीथ मेरो बाइक” को आयोजना तथा रोयल राइनो राइडर्स चितवनको सहयोगमा दर्जन भन्दा बढी बुलेट राइडरहरूले दोस्रो पटक ठोरीको भ्रमण गरेका हुन् । १७ वटा बुलेट मोटरसाइकलमा एकसाथ शनिवार बेलुकी ठोरी आइपुगेका बुलेट राइडरहरूले ठोरी जङ्गल रिसोर्टमा राति बास बसेर आइतबार ठोरीका विभिन्न पर्यटकीय स्थलहरूको भ्रमण गरेको ठोरी जङ्गल रिसोर्टका सञ्चालक सुदीप थापाले जानकारी दिए ।

“घुम्दिम ठोरी” नारा सहित शनिवार बेलुकी ठोरी आइपुगेका उनीहरू आइतबार ठोरी घुमेर चितवन फर्किएको थापाले बताए । यसअघि गत वर्ष पनि उनीहरू ठोरी आएर पर्यटकीय स्थलहरूको भ्रमण गरेको थापाले बताए । आफूहरू दोस्रो पटक ठोरी आएको भन्दै अभियानका संयोजक मान्दिप मान श्रेष्ठले भने, ‘हामी करिब ३८ किलोमिटर लामो राष्ट्रिय निकुञ्ज र माडी क्षेत्रको यात्रासँगै ठोरीको प्राकृतिक मनोरमसँग स्पर्श गर्न पाउँदा धरै खुसी भएका छौँ । उनले नेपालको सबैजसो पर्यटकीय गन्तव्यमा पुग्ने सोच बनाएको पनि उनले बताए । आन्तरिक पर्यटन प्रवर्द्धन गर्ने आफूहरूको मुख्य उद्देश्य रहेको उनले बताए ।