वीरगंज । बाराको पचरौता नगरपालिका – १ पिपरपाती निवासी अमरेश सिंहको हत्याको आरोपमा प्रहरीले तिन जनालाई पक्राउ गरेको छ । पक्राउ पर्नेमा सोही स्थानका श्यामलाल महतो र उनका दुई जना छोरा लाल महतो र अवधेशकुमार महतो रहेका छन् । आइतबार पत्रकार सम्मेलनको आयोजना गर्दै बारा प्रहरीले उनीहरूलाई सार्वजनिक गरेको हो । प्रहरीका अनुसार श्यामलाल र उनका छोराहरूले मिलेर असोज ८ गते सिंहको टाउकोमा धारिलो हतियारले प्रहार गरेर हत्या गरेका थिए । प्रहरीलाई सिंहको शव सोही दिन नेपाल–भारत सीमा नजिकै फेला परेको थियो ।

हत्या गरिएका सिंह पूर्व सशस्त्र प्रहरी जवान हुन् । केही महिना अगाडि मात्रै जागिरबाट राजीनामा दिएर उनी पचरौतासँग जोडिएको नेपाल–भारत सीमा नजिकै रक्सी पसल सञ्चालन गर्दै आइरहेका थिए । आफ्नो परिवारको एक जना सदस्यसँग अवैध यौन सम्बन्ध राखेको कारण सिंहको हत्या गरेको श्यामलाल र उनका दुवै जना छोराले प्रहरीलाई बयान दिएका छन् । बारा प्रहरीका प्रमुख एवम् प्रहरी उपरीक्षक (एसपी) सुरेशकुमार काफ्लेका अनुसार श्यामलालले आफ्नो परिवारको एक जना सदस्यसँग मृतक सिंहको अवैध यौन सम्बन्ध रहेको थाहा पाएपछि छोराहरूसँग मिलेर उनको हत्या गरेका थिए । परिवारको इज्जत जोगाउनका लागि योजना बनाएर सिंहको हत्या गरिएको श्यामलालले प्रहरीलाई दिएको बयानमा भनेका उनले बताए ।

सिंहको हत्यामा थप व्यक्ति पनि संलग्न रहेको प्रहरीको भनाई छ । ‘उनको हत्या गर्ने योजनाकार मध्ये अहिले दुई जना फरार छन् । उनीहरूकै सहयोगमा सिंहको हत्या भएको छ,’ एसपी काफ्लेले भने, ‘खोजी कार्य जारी छ ।’ उनका अनुसार फरार रहेका मध्ये एक जना श्यामलालका भाइ हुन् भने अर्का भारतीय नागरिक हुन् । भारत पूर्वी चम्पारण मोतीहारी ग्राम पञ्चायत झझरा बस्ने राहुल कानु र पचरौता नगरपालिका–१ कै श्यामलाल महतोका भाइ जागरित महतोको फरार रहेको प्रहरीले जनाएको छ । प्रहरीले सिंहको हत्यामा प्रयोग गरिएको एक थान धारिलो हतियार दाब, एक थान चक्कु र एउटा मोबाइलसमेत बरामद गरेको छ ।