वीरगंज । उपप्रधान तथा गृहममन्त्री नारायणकाजी श्रेष्ठले माओवादी नेतृत्वको वर्तमान सरकारले थालेको सुशासन र समृद्ध नेपाल बनाउने अभियानलाई असफल बनाउन षडयन्त्र भइरहेको बताएका छन् । आइतबार वीरगन्जमा नेकपा माओवादी केन्द्रले आयोजना गरेको पार्टी प्रवेश कार्यक्रमलाई सम्बोधन गर्दै माओवादीका वरिष्ठ उपाध्यक्षसमेत रहेका श्रेष्ठले यस्तो बताएका हुन् । उनले भने,‘ सम्माननीय प्रधानमन्त्री प्रचण्ड नेतृत्वको सरकारले नयाँ नेपाल र समृद्ध नेपाल बनाउन थालेको सुशासनको अभियान असफल बनाउन भ्रष्टचारी , तस्कर , माफीया र ठगहरुले अनेक षडयन्त्र गरिरहेका छन् । तर प्रधानमन्त्री प्रचण्ड त्यो षडयन्त्रबाट डराउनु भएको छैन , सुशासनको अभियान सफल पारेरै छाड्नु हुन्छ ।
सुशासन र समृद्ध नेपालको अभियानलाई सफल बनाउन माओवादी पार्टीलाई अझ बलियो बनाउनुपर्ने आजको आवश्यकता भएकोपनि उनले बताए । विगतमापनि राजनीतिक परिवर्तनलाई उल्ट्याउन खोज्ने प्रतिगामीलाई परास्त गर्ने पार्टी माओवादी नै भएको भन्दै श्रेष्ठले भने,‘ यो मुलुकमा सुशासन , विकास र समृद्धि माओवादीको नेतृत्वबाट मात्रै सम्भव छ । त्यसका कारण माओवादीलाई अझ बलियो बनाउनु पर्छ । प्रचण्ड नेतृत्वको सरकारलाई अहिले घेराबन्दीमा पारेर असफल बनाउने षडयन्त्रपनि भइरहेकाले त्यसका विरुद्ध खबरदारी गर्न उनले पार्टीका नेता कार्यकर्तासंग अपिलपनि गरे । उनले पार्टीले भदौंं १६ गतेदेखि जनतासंग माओवादी रुपान्तरण अभियान सुरु गर्न लागेको जानकारी गराए । श्रेष्ठले भने,‘ उक्त अभियान मार्फत माओवादी पार्टी अब हरेक जनताको घरघरमा पुग्छ ।देशैभर माओवादीको लहर आउँछ ।
केहिदिन यता मुलुकमा जातीय र धार्मिक सद्भाव बिथोल्ने नियतले जातीय र धार्मिक मुद्धालाई गलत ढंगले उचालेर गलत गतिविधी भइरहेकोपनि उनले बताए । उनले भने,‘ नेपालको पहिचान नै जातीय विविधतामा एकता र धार्मिक सहिष्णुता हो । तर यसलाई बिथोल्ने षडयन्त्र भइरहेको छ । जुन कदापी सह्य हुन्न । कार्यक्रममा गत निर्वाचनमा नेपाल सुशासन पार्टीबाट प्रदेश सभा सदस्यको प्रत्याशी बनेका शीवकुमार साह तेली , कांग्रेसका स्थानीय नेता शेख अरमान गरी विभिन्न दलका पाँच सय भन्दा बढी नेता कार्यकर्ता माओवादीमा प्रवेश गरेको युवा नेता प्रभाकर गुप्ताले जानकारी दिए । माओवादी केन्द्रका जिल्ला अध्यक्ष रामदरश कुशवाहाको अध्यक्षतामा आयोजितत कार्यक्रमलाई माओवादी केन्द्रका सचिव लिलामणी पोखरेल लगायतका नेतालेपनि सम्बोधन गरेका थिए ।
