रौतहट । कुमार चन्दन । रौतहटका राजमार्गमा अटोमेटिक नम्बर प्लेट रिडर क्यामेरा जडान गरिने भएको छ । जिल्लाको चन्द्रनिगाहपुर अन्तर्गत रहेको महेन्द्र राजमार्ग र बिरेन्द्र राजमार्ग अब सिसिटिभीको निगरानीमा रहने भएको छ ।
दुबै राजमार्गमा अत्यधिक द्रुतगतिमा सवारी साधन चल्न थालेपछि चन्द्रपुर नगरपालिकाले महेन्द्र राजमार्गको जुडिबेला चोक र जिल्ला ट्राफिक प्रहरी कार्यालयको पश्चिम तर्फ तथा बिरेन्द्र राजमार्ग अन्तर्गत घोडदेवि मंदिर नजिक सिसिटिभी राख्न थालेको हो । सवारी साधनको उच्च गतिलाइ रोक्नको लागी अटोमेटिक नम्बर प्लेट रिडर क्यामेरा जडान गर्न लागिएको चन्द्रपुर नगरपालिकाका नगर प्रमुख संजय कुमार काफलेले जानकारी दिएका छन ।सवारी र्दुघटना न्युनिकरण गर्नको लागी राजमार्गको ३ स्थानमा क्यामेरा जडान गर्न लागिएको नगर प्रमुख काफ्लेले बताए ।
उक्त सिसिटिभि क्यामेराको मोनिटरिङ जिल्ला ट्राफिक प्रहरी कार्यालय चन्द्रनिगाहपुरमा राखिने भएको छ । सिसिभिटी क्यामेरा जडानको लागी बिहीबार स्थान छनौट गरिएको थियो । स्थान छनौटको लागी नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयका प्रहरी उपरिक्षक सन्तोष कुमार भट्टराई, चन्द्रपुर नगरपालिकाका नगर प्रमुख संजय काफले, उप-प्रमुख जयमाला चौधरी, प्रमुख प्रशासकिय अधिकृत किरणनिधि तिवारी, जिल्ला ट्राफिक प्रहरी कार्यालय रौतहटकी प्रमुख प्रहरी निरिक्षक बिमला कठायत, वाड नं. ४ का वडाध्यक्ष रबि राना मगर, वाड नं. ८ का वडाध्यक्ष जितेन्द्र चौधरी लगायतको सहभागिता रहेको थियो ।