वीरगंज । स्कार्पियो गाडीमा लागु औषध गाँजा ओसार पसार गर्ने ७ जनालाई प्रहरीले ठूलो परिमाणमा गाँजासहित पक्राउ गरेको छ ।बाराको जितपुरसिमरा उपमहानगरपालिका वडा नम्बर ११ अमलेखगञ्जबाट प्रहरीले १५७ केजी गाँजासहित चार भारतीय र तीन नेपालीलाई पक्राउ गरेको हो ।

बाराका प्रहरी उपरीक्षक होविन्द्र बोगटीका अनुसार , गोप्य सुचनाको आधारमा आइतबार साँझ ईलाका प्रहरी कार्यालय सिमराबाट खटिएको प्रहरी टोलीले अमलेखगञ्मा पुगेर बा ११ च ४९९२ नम्बरको स्कार्पियोमा ६ वटा पोकामा रहेको १५७ केजी गाँजासहित मकवानपुरको हेटौडा उपमहानगरपालिका वडा नम्बर १ घर भएका ३९ वर्षिय रोशन नेगीलाई पक्राउ गरेको थियो ।गाँजा लोड गरेको स्कोर्पियो सहित पक्राउ परेका चालक रोशन नेगीकै बयानको आधारमा अन्य ६ जनालाई पनि पक्राउ गरिएको प्रहरी उपरीक्षक बोगटीले बताए ।

पक्राउ पर्नेहरुमा स्कार्पियोका चालक गिरीसंगै मकवानपुरको भिमफेदी गाउँपालिका वडा नम्बर ९ का ३० वर्षिय मुकेश लामा, बाराको जितपुरसिमरा उपमहानगरपालिका वडा नम्बर २२ का ३३ वर्षिय बुद्ध पाख्रिन , भारतको बहराईच जिल्लाका २६ वर्षिय अलि अहमद, मोतिहारीका २३ वर्षिय जमालुदिन खान, १८ बर्षिय देव कुमार र ३५ वर्षिय जागिरदिन मियाँ रहेको प्रहरी उपरीक्षक बोगटीले बताए । गाँजासहित पक्राउ परेकाहरुको साथबाट बा ११ च ४९९२ नम्बरको स्कार्पियोसंगै बीआर ०५ जी ८६५६ नम्बरको भारतीय पिकअप गाडी र बिआर ०५ जेड ८९६१ भारतीय नम्बर प्लेटको पल्सर मोटरसाईकलपनि बरामद गरिएको बोगटीले जानकारी दिए । गाँजासहित पक्राउ परेकाहरुलाई प्रहरी हिरासतमा राखेर अनुसन्धान प्रकृया अगाडि बढाइएको बोगटीले बताए ।