वीरगंज । सय किलो सुन तस्करीको अनुसन्धान जिम्मा नेपाल प्रहरीले पाएको छ । राजस्व अनुसन्धान विभागमार्फत भन्सार छली र तस्करीको कसुरमा तीन सातादेखि भइरहेको अनुसन्धानको दायरा फराकिलो बनाउँदै सरकारले संगठित अपराधअन्तर्गत अनुसन्धान गर्न प्रहरीलाई जिम्मेवारी दिएको हो । तस्करीको नेक्सस राजस्व चुहावटमात्र नभई संगठित रूपमा भएको अन्तर्देशीय अपराध पनि भएकाले प्रहरीलाई अनुसन्धानको जिम्मा दिएको विभागले जनाएको छ । विभागका महानिर्देशक नवराज ढुंगानाले आइतबार पत्रकार सम्मेलन गरी हालसम्म खुलेका तथ्य, प्रमाण र पक्राउ परेका आरोपितसहित संगठित अपराधमा अनुसन्धान गर्न प्रहरीलाई जिम्मा दिएको बताए । त्यसलगत्तै आरोपित १७ जनालाई केन्द्रीय अनुसन्धान ब्युरोको हिरासतमा पठाइएको थियो । केही दिनअघि प्रधानमन्त्री पुष्पकमल दाहालले यो प्रकरणमा संगठित अपराध, अन्तर्देशीय अपराध र आतंकवादसँग पनि जोडेर अनुसन्धान गर्न प्रहरीलाई निर्देशन दिएका थिए । विभाग प्रधानमन्त्रीमातहतको निकाय हो । ‘बृहत् अनुसन्धान गर्नुपर्ने भएकाले प्रहरीलाई जिम्मा दिइएको हो,’ विभागका महानिर्देशक ढुंगानाले भने, ‘अब सम्पूर्ण अनुसन्धान प्रहरीबाट हुनेछ ।
यसका लागि दक्ष जनशक्ति आवश्यक हुने भएकाले नै प्रहरीलाई जिम्मेवारी दिइएको हो ।’ आफूहरूले गरेको अनुसन्धानबाट तस्करीसँग जोडिएका धेरै ‘कनेक्सन’ खुलेको उनले बताए । अनुसन्धानका क्रममा विभिन्न तथ्य फेला परे पनि अहिले सार्वजनिक गर्न नमिल्ने उनले बताए । सरकारी वकिलको लिखित रायअनुसार अनुसन्धानबाट संकलन गरिएका सबै कागजपत्र प्रहरीलाई हस्तान्तरण गरिएको छ । विभागको टोलीले पक्राउ परेका आरोपित, बरामद सबुत प्रमाण र अनुसन्धानको प्रगति प्रतिवेदन प्रहरी महानिरीक्षक बसन्त कुँवरलाई हस्तान्तरण गरेको हो । त्यसपछि महानिरीक्षक कुँवरले आइतबार साँझ नै अनुसन्धानको जिम्मेवारी सीआईबीलाई दिएका हुन् । पक्राउ परेकालाई सीआईबीकै हिरासतमा पठाइएको छ । सुन तस्करी प्रकरणमा नेपाल, भारत र चीनसँग ‘कनेक्सन’ जोडिएको अनुसन्धानबाट खुलिसकेको छ । विदेशबाट भित्रिएको सुन काठमाडौंमा व्यवस्थापन गरी गिरोहले भारतसम्म पठाउन विभिन्न तहका भरिया र एजेन्ट परिचालन गरेको पनि खुलेको छ तर तस्करी प्रकरणमा सुन व्यवस्थापन हुन नपाई गिरोहको एउटा जालो फन्दामा परेको हो । विभागले अनुसन्धान विदेशी नागरिकमाथि केन्द्रित गरेको थियो ।
अनुसन्धानकै क्रममा सय किलो सुन तस्करी प्रकरणअघि नै करिब ७ क्विन्टल सुन तस्करीबाट बाहिरिएको आशंका छ । सुन ल्याएका खोक्रा ब्रेक सुमात्रै भेटिएकाले त्यो सुन पनि कहाँ पुग्यो भन्ने अनुसन्धान हुने प्रहरीले जनाएको छ । विभागले २०८० साउन २ मा त्रिभुवन विमानस्थल भन्सार कार्यालयबाट जाँच पास भएर बाहिरिएको सुन सिनामंगल सडकबाट बरामद गरेको थियो । राजस्वले करिब तीन साता यो प्रकरणमा अनुसन्धान गर्यो तर विभागबाट मात्रै अनुसन्धान हुन नसक्ने आवाज उठेपछि प्रहरीको भूमिका खोजी भएको थियो । विभागले भने आफैं अनुसन्धान गर्ने बताउँदै आएको थियो । यो प्रकरणमा तीन विदेशीसहित १८ जना पक्राउ परेका छन् । हङकङबाट गत असार २९ मा क्याथे प्यासिफिकको जहाजबाट स्कुटरका ब्रेक सुभित्र लुकाएर सय किलो सुन ल्याइएको थियो । उक्त प्रकरणमा विमानस्थल भन्सारका तीन कर्मचारी, बेल्जियन, भारतीय र चिनियाँ नागरिक, कार्गो व्यवसायी, भन्सार एजेन्ट, फर्म मालिकलगायत पक्राउ परेका छन् । पक्राउ परेकामध्ये एक जना एजेन्टलाई हाजिर जमानीमा छाडिएको छ भने १७ जना प्रहरीलाई बुझाइएको छ ।
