वीरगंज । पर्सा जिल्लामा बलात्कार, हत्या लगायत गम्भिर अपराधका घटनाहरु बढेको छ ।पर्सामा अघिल्लो आर्थिक वर्ष २०७८/७९ को तुलनामा गत आर्थिक वर्ष २०७९/८० मा बलात्कार, हत्या लगायतका गम्भिर अपराधका घटनाहरु बढेको जिल्ला प्रहरी कार्यालय पर्साले जनाएको छ । जिल्ला प्रहरी कार्यालय पर्सामा अघिल्लो आर्थिक वर्ष २०७८/७९ मा जबरजस्ति करणी (बलात्कार), जबरजजस्ती करणी उद्योग , कर्तब्य ज्यान (हत्या) , बाल यौन दुव्र्यवहार , मानव बेचबिखन गरि गम्भिर अपराध सम्बन्धि ६६ वटा मुद्धा दर्ता भएका थिए ।तर गत आर्थिक वर्ष २०७९÷८० मा भने उक्त अपराधको संख्या बढेर ७८ वटा मुद्धा दर्ता भएको पर्साका प्रहरी उपरीक्षक कोमल शाहले जानकारी दिए ।

पर्साका प्रहरी उपरीक्षक कोमल शाहका अनुसार , गत आर्थिक वर्षमा सबै भन्दा बढि बलात्कार र बलात्कारको प्रयास सम्बन्धि घटना भएका छन् । गत आर्थिक वर्षमा जिल्ला प्रहरी कार्यालय पर्सामा बलात्कारका ४९ र बलात्कारको प्रयासका ५ वटा गरि ५४ वटा मुद्धा दर्ता भएको शाहले जानकारी दिए ।अघिल्लो आर्थिक वर्षमा भने पर्सा प्रहरीमा बलात्कारका ३४ र बलात्कारको प्रयासका १३ वटा गरि ४७ वटा मात्र मुद्धा दर्ता भएको थियो ।पर्सामा गत आर्थिक वर्षमा अघिल्लो आर्थिक वर्षको भन्दा बलात्कार र बलात्कारको प्रयासका गरि ७ वटा घटना बढी भएको प्रहरी उपरीक्षक शाहले बताए । यस्तै पर्सा प्रहरीमा गत आर्थिक वर्षमा कर्तब्य ज्यान (हत्या) सम्बन्धि १६ वटा मुद्धा दर्ता भएका छन् । अघिल्लो आर्थिक वर्षमा भने कर्तब्ब्य ज्यान सम्बन्धि ११ वटा मात्र मुद्धा दर्ता भएको थियो । यसैगरि पर्सा प्रहरीमा गत आर्थिक वर्षमा बाल यौन दुव्र्यवहारका ४ र मानव बेचबिखनका पनि ४ वटा मुद्धा दर्ता भएको प्रहरी उपरीक्षक शाहले बताए । जबकि अघिल्लो आर्थिक वर्षमा भने बाल यौन दुव्र्यवहारका १ र मानव बेचबिखनका ७ वटा मुद्धा दर्ता भएका थिए । जिल्ला प्रहरी कार्यालय पर्सामा बलात्कार सम्बन्धि मुद्धा दर्ताको संख्या बढ्नुको विभिन्न कारणहरु रहेको प्रहरी उपरीक्षक शाहले बताए ।

गाँउघरमा पछिल्लो समय विवाहको उमेर नपुगेका किशोरी आफनो प्रेमीसंग भागेपछि किशोरीका अभिभावकले प्रहरी कार्यालयमा जबरजस्ति करणीको मुद्धा दर्ता गराउने गरेका कारण बलात्कारका मुद्धा दर्ताको संख्या बढेको उनले बताए । यसका साथै लिभिङ टुगेदरमा रहेका प्रेमी प्रेमिका बिच पछि गएर सम्बन्ध बिग्रिएपछि प्रेमिका (युवती वा महिला) ले प्रेमी विरुद्ध बलात्कारको मुद्धा दर्ता गराउने गरेका कारणले पनि बलात्कार सम्बन्धि मुद्धा दर्ताको संख्या बढि देखिन गएको उनले बताए । शाहले भने,‘ केहि त वास्तविक रुपमै जबरजस्ति करणी गरेका घटना भएका छन् , तर त्योसंगै केटासंग भागेका केटी (१८ वर्ष भन्दा कम उमेरका ) का अभिभावकले आफनी छोरीको बलात्कार भयो भनेर मुद्धा दर्ता गराउछन् , जुन कानुन अनुसारपनि जबरजस्ति करणी नै हुन्छ । यसका साथै पछिल्लो समय प्रहरी प्रति बढ्दै गएको जनविश्वास र प्रहरी कहाँ पुगे न्याय पाइन्छ भन्ने चेतनापनि जनमानसमा बढ्दै गएका कारणले पनि बलात्कार सम्बन्धि मुद्धा दर्ताको संख्यामा बृद्धि भएको शाहले बताए । शाहले भने,‘ पहिलेपहिले यस्ता घटनाहरु सामाजिक दबाब लगायतका कारणले गाँउघरमै मिलापत्र गराएको भेटिन्थ्यो , प्रहरीसामु ती घटना आउनै पाउँदैन्थ्यो तर पछिल्लो समय जनचेतना बढ्दै गएको छ, प्रहरीकोमा पुगे न्याय पाइन्छ भन्ने प्रहरीप्रतिको जनविश्वास बढ्दै गएको कारणले प्रहरीकोमा ती घटनाहरु आइरहेका छन् ।