वीरगंज । पर्सा क्षेत्र नम्बर २ का प्रतिनिधी सभा सदस्य अजय चौरसियाले वीरगन्जसहित पर्सा जिल्लाभर देखिएको पानी अभावको संकट समाधान गर्न केन्द्र र प्रदेश सरकारले तत्काल अग्रसरता लिनुपर्नेमा जोड दिएका छन् । वीरगन्जमा अहिले देखिएको पानीको संकटबारे वीरगन्ज महानगरपालिकाले बिहीबार आयोजना गरेको छलफल कार्यक्रममा बोल्दै सांसद चौरसियाले महानगरपालिकाले गरिरहेको प्रयास प्रयाप्त नभएको भन्दै केन्द्र र प्रदेश सरकारले तत्काल अग्रसरता लिनुपर्नेमा जोड दिएका हुन् । कार्यक्रममा सहभागी केन्द्र सरकारका खानेपानी मन्त्री महेन्द्र राय यादवलाई सुनाउदै सांसद चौरसियाले भने,‘ महानगरपालिका र यहाँका संघीय सांसद र प्रदेश सांसदले सकेको जति प्रयास गरिरहेका छन् , तर सिमित श्रोतसाधनका कारण त्यसले प्रयाप्त पुगिरहेको छैन , त्यसकारण केन्द्र र प्रदेश सरकारले तत्कालै यहाँ उत्पन्न पानीको समस्या समाधानका लागि पहल थालिहाल्नुपर्छ ।

अर्थमन्त्री प्रकाशरण महतलाई नै आफुले भेटेर वीरगन्जसहित पर्सा जिल्लामा निम्तिएको पानीको संकट समाधानका लागि आवश्यक बजेट व्यवस्थापन गरिदिन आग्रह गरेको जानकारीपनि उनले गराए । संसद विकास कोषको रकम १ करोड भन्दा कमको योजनामा खर्च गर्न नपाउने संवैधानिक प्रावधानले समस्या भएको बताउदैं उनले भने,‘ त्यसमापनि संसद विकास कोष विरुद्ध सर्वोच्च अदालतमा मुद्धा परेको छ , त्यो मुद्धा छिनोफानो हुने बित्तिक्कै मैले मेरो संंसद विकास कोषको १ करोड रकम डिप बोरिङ जडानमा खर्च गर्ने घोषणा अहिलेनै गर्छु । उनले संस्थानमा सेवाग्राहीको चाप बढेकाले त्यसअनुसारको जनशक्ति तत्काल थप गरिदिन मन्त्री यादवसंग आग्रह गरे । चौरसियाले अहिलेको यो संकटमा जनतालाई राहत पुरयाउने क्रममा राजनीति नगर्न र सबैमिलेर यो संकटको सामना गर्नपनि महानगरपालिकाका जनप्रतिनिधीहरुलाई आग्रह गरे ।

महानगरका मेयर राजेशमान सिंहको अध्यक्षतामा भएको उक्त छलफल कार्यक्रममा पर्सा क्षेत्र नम्बर १ का प्रतिनिधी सभा सदस्य प्रदीप यादव, प्रदेश सभा सदस्यहरु श्याम पटेल र प्रमोद जयसवाल , जिल्ला समन्वय समिति पर्साका प्रमुख अजय सर्राफ ,संविधानसभा सदस्य अजय द्विवेदी , वीरगन्ज महानगरपालिका उपमेयर इम्तियाज आलम , पर्साका प्रमुख जिल्ला अधिकारी हिरालाल रेग्मी , नेपाली कांग्रेसका महानगर सभापति मणिन्द्रलाल श्रेष्ठ , जनता समाजवादी पार्टीका महानगर अध्यक्ष इश्वरचन्द्र यादव, वीरगन्ज महानगरपालिकाका प्रमुख प्रशासकीय अधिकृत लक्ष्मी प्रसाद पौडेलका साथै महानगरका ३२ वटै वडाका वडाअध्यक्ष , राजनीतिक दलका नेता लगायतको सहभागीता थियो ।